Mateo 16:13-20

 Ang Santos nga Ebanghelyo sumala ni San Mateo 16:13-20 (Sun. Aug. 27, 2023 Ikakawhaag Usa Nga Domingo Sulod Sa Tuig)

Unya miadto si Jesus sa yuta duol sa lungsod sa Cesarea Filipo ug didto nangutana Siya sa Iyang mga tinun-an, “Sumala sa mga tawo, kinsa man ang Anak sa Tawo ?” Sila mitubag, “May nag-ingon nga Siya mao si Juan nga Magbubunyag. Ang uban nag-ingon nga Siya mao si Elias samtang ang uban nag-ingon nga Siya mao si Jeremias o laing propeta.” Si Jesus nangutana kanila, “Apan kamo, unsa may inyong ikasulti ? Kinsa man Ako ?” Ug mitubag si Simon Pedro, “Ikaw mao ang Mesiyas, ang Anak sa Dios nga buhi.” Giingnan siya ni Jesus, “Bulahan ka gayod, Simon nga anak ni Jonas. Kay kining maong kamatuoran wala moabot kanimo pinaagi sa bisan unsang tawhanong pamaagi. Ang Akong Amahan nga atua sa langit mao ang naghatag niini kanimo. Busa sultihan Ko ikaw : ikaw si Pedro ug ibabaw niining bato tukoron Ko ang Akong simbahan ug bisan gani ang kamatayon dili gayod makabuntog niini. Ihatag Ko kanimo ang mga yawi sa Gingharian sa langit : ang imong idili dinhi sa yuta, idili usab didto sa langit. Ug ang imong itugot dinhi sa yuta, itugot usab didto sa langit.” Unya gipasidan-an ni Jesus ang Iyang mga tinun-an nga dili isaba kang bisan kinsa nga Siya mao ang Mesiyas.

Pamalandong :

ASA MAN MAGAGIKAN ANG TANANG GAHOM DINHI SA KALIBUTAN ? 

Daghan ang gahunahuna nga ang gahum sa tawo nagagikan sa iyang bahandi, kaalam, o kaha sa katungdanan nga iyang gihuptan. Apan niining Domingoha, gipahinumduman kita nga ang tanang gahum nagagikan gayod sa Dios. Ang unang pagbasa (Is. 22:19-23) nagpakita sa katungod sa Dios sa pagpalagpot og abusadong tinugyanan ug sa pagtudlo'g ikapuling pangulo nga ginganla’g Eliakim, usa ka tawong mapaubsanon ug maalagaron. Diha sa Ebanghelyo, gibutyag nga si Pedro maoy gitugyanan ni Jesus nga maghawid sa yawi sa Gingharian sa Langit ug sa pagdumala sa Iyang  Simbahan. Kini magpahinumdum sa tanang opisyales sa gobyerno ug sa simbahan nga ang ilang gahum gipahulaman lamang kanila sa Dios ug angay nilang gamiton sa maayong pagpangalagad, dili sa pag-abuso, sa katawhan. 

Dugang pa niini, ang Ebanghelyo  nagasaysay usab kanato nga ang atong pag-ila ug pagsunod kang Cristo maoy bunga ug inspirasyon gikan sa Dios Amahan. Kini nga kamatooran, makapadasig ug makapahimo natong mapaubsanon. “Makapadasig” tungod kay kini nagpasabot nga wala diay kita mag-inusara sa atong pagpangita sa kamatuoran ug kaluwasan. Aduna diay Dios Amahan nga nagtultol kanato sa dalan padulong sa langit. “Makapahimo natong mapaubsanon,”  nagpasabot kini  nga kun ang atong kaugalingong katakos ra maoy saligan, dili gayod kita makaabot ug makasulod sa Gingharian sa Dios. Matod pa sa tambag ni Charles Spurgeon," If you wish to know God, you must know His Word. If you wish to perceive His power, you must see how He works by his Word. If you wish to know His purpose before it comes to pass, you can only discover it by His Word.

pohsiBtebAyU