Mateo 13:54-58

 Ang Santos nga Ebanghelyo sumala ni San Mateo 13:54-58 (Fri. Aug. 4, 2023)

Mipauli Siya sa lungsod nga Iyang gipuy-an. Nagtudlo Siya didto sa ilang sinagoga ug natingala ang nakadungog Kaniya. “Diin man Niya kuhaa kining maong kaalam ?” Nangutana sila. “Ug diin man Siya'g gahom paghimo'g mga milagro ? Dili ba mao man kana Siya ang anak sa panday ? Dili ba si Maria man ang Iyang inahan ? Ug dili ba igsoon man kana Siya ni Santiago, ni Jose, ni Simon ug ni Judas ? Dili ba nia man dinhi magpuyo ang tanan Niyang mga igsoong babaye ? Diin man Niya kuhaa kining tanan ?” Tungod niini gisalikway nila Siya. Ug miingon si Jesus kanila, “Ang usa ka propeta tinahod bisan diin gawas lang sa lungsod nga iyang gipuy-an ug sa iyang kaugalingong panimalay.” Busa wala Siya mohimo'g daghang milagro didto kay wala man sila'y pagtuo.

Pamalandong :

SAYON BA ANG PAGSANGYAW SA MENSAHE SA DIOS NGADTO SA UBAN ? 

Sumala sa kasinatian, ang pagpasabot og tawo sa kamatuoran o kaha sa kabubut-on sa Dios lisod kaayong buhaton. Adunay magpabungol-bungol, adunay pilosopo, ug adunay magbiay-biay kanato. Bisan gani diha sa atong pamilya, adunay mga sakop nga gahi’g ulo ug dili madala ngadto sa Ginoo. Apan bisan tuod malisod, dili nato angay’ng talikdan ang atong kaakohan isip mga propeta sa Dios alang sa uban. Si Jesus mismo nakasinati’g pagsalikway ug pagtamay gikan sa Iyang katawhan ug kaparyentihan. Apan bisan pa niini, nagpadayon Siya sa pagsangyaw sa gugma sa Dios. Adunay nag-ingon : “If you are a Christ follower, you are a missionary. Whether it’s next door or across the globe, it’s our mission to share the love of Jesus.”

pohsiBtebAyU