Mateo 9:32-38

 Ang Santos nga Ebanghelyo sumala ni San Mateo 9:32-38 (Tue. July 11, 2023)

Sa pagpanglakaw na sa mga tawo, dihay pipila nga nagdala ngadto kang Jesus ug usa ka tawo nga naamang tungod kay gisudlan kinig yawa. Sa nahinginlan na ang yawa, nakasulti ang tawo ug nahibulong ang tanan nga nag-ingon, “Wala pa gayoy nahitabo nga sama niini dinhi sa Israel !” Apan miingon ang mga Pariseo, “Ang pangulo sa mga yawa maoy naghatag Kaniyag gahom sa pagpagula kanila. Unya gilibot ni Jesus ang tanang kalungsoran ug kabaryohan. Nanudlo Siya didto sa ilang mga sinagoga ug giwali Niya ang Maayong Balita bahin sa paghari sa Dios. Giayo usab Niya ang mga tawo sa tanan nilang balatian ug sakit. Sa pagkakita Niya sa daghang mga tawo, naluoy Siya kanila kay nagluya man sila ug walay kadasig, morag mga karnero nga walay magbalantay. Busa giingnan Niya ang Iyang mga tinun-an, “Daghan ang anihonon apan diyutay ra ang mangangani. Busa pag-ampo kamo sa tag-iya sa anihonon aron magpadala siyag dugang pang mangangani.”

Pamalandong :

UNSA MAY ATONG BUHATON ARON MAKATABANG SA UMAHAN SA DIOS ? 

Una sa tanan, angay natong puy-an ang bokasyon sa pagkamagbalantay sa karnero. Dili kita manundog ni Cain nga wala manginlabot sa iyang igsoon. Matag usa kanato kinahanglan nga mahimong buotang Samaritano para sa mga nanginahanglan, ilabina sa mga masakiton, tigulang, walay trabaho ug gigutom. Dugang pa niini, dasigon ug suportahan nato ang mga batan-on nga buot magpari o magrelihiyoso. Ang mga pari ug madre labi na gayod ang mga layko adunay bililhong papel tungod kay sila ang gitahasan sa pag-una sa pagpangalagad diha sa katilingban sa Dios. Pinaagi sa ilang Kristohanong panig-ingnan, madasig unta ang katawhan sa paghigugmaay ug pagtinabangay sa usag-usa. Adunay nindot nga sinultihon si Pope John XXIII nga nagkanayon : " Christ's flock is made up of sheep that not only listen to their shepherd, but are also able to recognize his voice, to follow him, faithfully and with full awareness, on the pastures of eternal life."

pohsiBtebAyU