Mateo 8:28-34

 Ang Santos nga Ebanghelyo sumala ni San Mateo 8:28-34 (Wed. July 5, 2023)

Unya miabot si Jesus sa yuta sa Gadara didto sa tabok sa lanaw ug gitagbo Siyag duha ka tawo nga nanggula gikan sa mga langub nga gihimong lubnganan. Giyawaan kining mga tawhana ug bangis kaayo busa walay nangahas pag-agi niadtong dalana. Ug misinggit sila, “Anak sa Dios, unsa may Imong tuyo kanamo ? Mianhi Ka ba aron pagsakit kanamo bisag dili pa panahon ?” Dili layo didto, may usa ka panon sa mga baboy nga nanibsib. Mihangyo ang mga yawa kang Jesus, “Kon abugon Mo kami pasudla kami nianang panon sa mga baboy.” “Sigi, panulod kamo,” miingon si Jesus. Ug mipahawa ang mga yawa ug nanulod sa mga baboy. Unya ang tibuok panon sa baboy nanaglumba paingon sa pangpang ug nangambak sa lanaw ug nangalumos. Ang mga nag-atiman sa mga baboy nanagan ngadto sa lungsod aron pagsugilon sa tanang nahitabo ingon man sa gidangatan sa mga giyawaan. Tungod niini nanggawas ang tanang tawo niadtong lungsora aron pagsugat kang Jesus ug sa ilang pagkakita Kaniya, nangaliyupo sila nga mobiya Siya sa ilang dapit.

Pamalandong :

UNSAON MAN NATO PAGPANAGANG BATOK SA MGA DAOTANG ESPIRITU ?

 Gikahinagbo ni Jesus diha sa dalan ang duha ka tawo nga nasudlan og panon sa mga daotang espiritu. Panon kini ug dili lang pipila ka mga demonyo. Apan ang mga demonyo niila kang Kristo isip anak sa Dios ug nasayod sa Iyang gahum sa pagbuntog kanila. Ug tuod man, sa usa ka pagmando, gipapahawa ni Jesus ang mga daotang espiritu ug kini nanulod sa mga baboy, nangambak sa lanaw ug nangalumos. Dinhi, atong masabot nga ang pwersa sa yawa walay ikasukol batok sa gahum sa Dios. Busa, aron walay daotang espiritu nga manghilabot kanato, dalhon nato kanunay si Jesus sa atong kinabuhi. Kada adlaw, ato Siyang sangpiton diha sa pag-ampo, paminawon diha sa pagpamalandong sa Pulong, ug sundon diha sa paghigugma sa atong isigkaingon. Adunay panultihon si Pope Pius Xll nga nagkanayon," a man without a prayer is like a tree without roots."

pohsiBtebAyU