Juan 20:24-29

 Ang Santos nga Ebanghelyo sumala ni San Juan 20:24-29 (Mon. July 3, 2023)

Si Tomas nga ginganlag Kaluha, usa sa 12 ka tinun-an, wala mahiuban kanila sa pag-anha ni Jesus. Busa gisuginlan siya sa ubang mga tinun-an, “Nakita namo ang Ginoo !” Si Tomas miingon kanila, “Gawas kon makita ko ug ikabutang ang akong tudlo sa inagian sa mga lansang diha sa Iyang kamot ug mahikap ko ang samad sa Iyang kilid, dili ako motuo.” Human molabay ang usa ka semana, nagtigom na usab ang mga tinun-an sulod sa lawak ug uban na kanila si Tomas. Gitrangkahan ang mga pultahan apan mitungha si Jesus ug mitindog sa taliwala nila ug miingon, “Mainyo ang kalinaw.” Unya miingon siya kang Tomas, “Tan-awa ang Akong kamot ug hikapa kini. Hikapa usab ang samad sa Akong kilid. Tuo ug ayaw na pagduhaduha !” Si Tomas miingon Kaniya, “Ginoo ko ug Dios ko !” Unya miingon si Jesus kaniya, “Mituo ka ba tungod kay nakakita ka Kanako ? Bulahan kadtong motuo bisan wala makakita Kanako !”

Pamalandong :

UNSA MAY PANIG-INGNAN NI TOMAS NGA ANGAY NATONG SUNDON ? 

Dili tanang pagduda bunga sa kahadlok ; aduna usay bunga sa kalibog ug kakulang sa kasiguroan. Si Tomas nagmatinud-anon sa iyang pagbati. Buot niya nga susihon una ang mga taho nga dili pa klaro sa iyang tawhanong salabotan. Adunay nag-ingon, “Courage without doubt is overconfidence.” Si Tomas dili madali-dalion ug dili tira-pasagad. Ug tungod niini, naiya ang talagsaong kahigayonan nga makahikap sa mga samad sa Nabanhaw’ng Ginoo. Human niya napamatud-an ang pagkabanhaw, wala na siya nagpanuko sa pagpadayag sa iyang pagtoo. Matod pa sa tradisyon sa Simbahan, gisangyaw ni Tomas ang Ebanghelyo sa walay kukahadlok sa daghang mga lugar hangtod nga siya gipatay didto sa India sa tuig 72 tungod kang Kristo. Matod pa sa tambag ni St. Francis de Sales, " When you encounter difficulties and contradictions, do not try to break them, but bend them with gentleness and time."

pohsiBtebAyU