Mateo 6:19-23

 Ang Santos Nga Ebanghelyo sumala ni San Mateo 6:19-23 (Fri. June 23, 2023)

“Ayaw kamo pagtigom ug mga bahandi alang sa inyong kaugalingon dinhi sa yuta kay tay-an lamang kini ug kutkuton sa anay o kawaton usab sa mga kawatan. Pagtigom  hinuon ug mga bahandi alang sa inyong kaugalingon didto sa langit diin walay taya ug anay nga makakutkot niini ug walay mga kawatan nga makakawat niini kay hain gani ang inyong bahandi atua usab didto ang inyong kasingkasing. “Ang mata maoy suga sa lawas. Kon maayo ang imong mata, malukop sa kahayag ang tibuok mong lawas. Apan kon daotan ang imong mata, malukop sa kangitngit ang imong lawas. Busa kon ang kahayag nga anaa kanimo kangitngit diay, unsa na lang kaha ang imong kangitngit !

Pamalandong :

UNSA MAY ATONG GIISIP NGA BAHANDI SA KINABUHI ? 

Ang tawo dali ra madani sa mga bahanding kalibotanon sama sa kwarta, balay, sakyanan, ug alahas. Dili man sayop ang paghupot og mga butang nga sama niini kon kini atong kab-oton sa saktong paagi, huptan sa igong gidaghanon, ug gamiton sa maayong tumong. Apan, adunay mga tawo nga mahungog sa mga butang kalibotanon ug tungod niini mahimo silang tikasan, bintahuso, laog, ug kawatan. Dili kini angay’ng mahitabo kanato. Mas maayo pa nga atong sundon ang gisugo ni Kristo nga mao ang pagtigum og mga bahanding langitnon, sama sa kaayo ug kamanggihatagon, kay kini dili madugta ug dili mawala. Sakto si Oscar Wilde sa iyang pag-ingon : “Ordinary riches can be stolen ; real riches cannot. In your soul are infinitely precious things that cannot be taken from you.”

pohsiBtebAyU