Mateo 10:37-42

 Ang Santos nga Ebanghelyo sumala ni San Mateo 10:37-42 (Sun. July 2, 2023)

“Ang nagmahal sa iyang amahan o inahan labaw kay Kanako dili takos nga mahimong tinun-an Nako. Kadtong nagmahal sa iyang anak labaw kay Kanako, dili usab takos mahimong tinun-an Nako. Ang dili mopas-an sa iyang krus ug mosunod Kanako, dili takos mahimong tinun-an Nako. Ug kadtong maniguro sa iyang kaugalingong kinabuhi, kawad-an niini. Apan ang kawad-an sa iyang kinabuhi tungod Kanako, makabaton hinuon niini. “Ang nagdawat kaninyo, nagdawat usab Kanako ug ang nagdawat Kanako, nagdawat usab Kaniya nga nagsugo Kanako. Ang nagdawat sa usa ka propeta tungod sa iyang pagkapropeta makadawat usab sa ganti alang sa usa ka propeta. Ang nagdawat sa tawo nga matarong, tungod sa iyang pagkamatarong, makadawat usab sa ganti nga alang sa tawo nga matarong. Ug hinumdomi kini : kadtong nagpainom ug bisan na lag bugnawng tubig sa labing ubos sa Akong mga sumusunod tungod kay siya Akong sumusunod, gantihan gayod.”

Pamalandong :

Usa sa bililhong pagtulon-an nga atong nakat-onan sa elementarya pa ta mao ang  sulti sa atong magtutudlo nga naga-ingon : “Sa paghigugma, unaha ang Dios, isunod ang nasod, ug sa ulahi ang pamilya.”  Mao kini ang angay nga han-ay sa dagan sa atong paghigugma. Unya, asa man dapit ang gugma para sa atong kaugalingon ? Ang kaugalingon kinahanglan adto ibutang sa pinaka-ulahi kay matod pa ni Kristo, “Kon may buot mosunod Kanako, kinahanglan nga magdumili sa kaugalingon, magpas-an sa iyang krus ug magsunod kanako” (Lukas 9:23). 

Gisunod ba kini sa mga tawo karong panahona ? Nasayod kita nga sa daghang mga tawo, wala kini sunda. Gani, daghan kanato gibali ang han-ay. Sa paghigugma, gi-una ang kaugalingon, sunod ang pamilya, ug sa pinakaulahi, ang nasod ug ang Dios. Unsa may bunga sa gugma nga giingon niini paghan-ay ? Kagubot, panagbingkil, kalisod ug kasakit. Kon ang mga tawo maniguro sa kaugalingon ug sa iyang pamilya, magkaguliyang ang katilingban ug daghan ang mag-antos.

Diha sa Ebanghelyo karong Domingoha, si Jesus nagtudlo kanato nga sundon ang angay'ng han-ay sa paghigugma. Unahon gayod nato ang Dios. Siya gayod ang angay nga atoa sa pinaka-ibabaw, mas labaw pa kaysa pamilya, mas labaw pa kaysa kaugalingon. Si Jesus miingon : “Ang nagmahal sa iyang amahan o inahan labaw kay Kanako dili takos nga mahimong Akong tinun-an. Kadtong nagmahal sa iyang anak labaw Kanako dili usab mahimong Akong tinun-an.” 

Nagpasabot ba kini nga ato na lang pasagdan ang atong pamilya ? Dili kana mao ang punto. Nasayod kita nga ang paghigugma sa mga ginikanan apil sa bililhong mga kasugoan sa Dios. Nasayod usab kita nga angay natong higugmaon ang atong isigkatawo, ug ang pinakaduol natong isigkatawo mao ang mga sakop sa atong pamilya. Unsa man gayod diay ang gipasabot ni Jesus niini ? Buot lamang Niya itudlo kanato nga kon unahon nato paghigugma ang Dios, ang ubang matang sa paghigugma mapahiluna sa saktong mga paagi. If we put God first in our lives, all other things will come into their proper place. Those who learn to love God first, will also learn to love others better. Kining tanan mapamatud-an sa atong mga kasinati-an. Ang tawong Diosnon mao usab ang tawong mahigugmaon. Ang tawo nga tinud-anay nga nag-alagad sa Dios makamao usab nga mag-alagad sa isigkatawo ug sa iyang pamilya.

Adunay makatandog nga estorya : "Usa ka amahan ang dali nga midala sa iyang anak nga nadisgrasya sa ospital. Sanglit walay surgeon nga nag duty atong panahona, gitawagan sa nurse ang usa ka doktor nga nag off atong panahona. Pagkadawat sa doktor sa emergency call, misutoy kini pagbiyahe padulong sa ospital. Pag-abot niya, gitagbo siya sa amahan ug gikasuk-an. “Kadugay ba nimo ! Wa baka masayod nga naglisod ning akong anak ! Unsaon na lang kon mamatay siya !” Ang doktor kalmado lang nga mitubag, “Unya na ta mag-estorya brod. Unahon sa nako pagtabang ang imong anak sa emergency room.” Human sa 3 ka oras nga operasyon, migawas ang doktor sa emergency room ug giingnan ang amahan sa bata, “Ayaw na kabalaka, salbar na ang imong anak. Alang sa iyang mga tambal, estoryaha lang ang nurse.” Ug milakaw ang doktor. Nagbagutbot ang amahan. “Wa gyoy batasan ning doktora. Tapolan. Itugyan lang ta sa nurse !” Apan ang nurse mipasabot kaniya. “Si doktor dili na makadugay og estorya nimo brod kay gihulat to siya sa sementeryo. Ilubong karon ang iyang anak nga nadisgrasya. Mianhi lang to siya tungod kay gusto siya nga maluwas ang imong anak.”

Unsa may bunga sa paghigugma subay sa kabubut-on sa Dios ? Si Jesus miingon : “Ang tawo nga maniguro sa iyang kaugalingong kinabuhi, kawad-an niini. Apan ang kawad-an sa iyang kinabuhi tungod Kanako, makabaton hinuon niini.” Paradox. Lisod sabton, apan tinuod kini. 

J – Jesus first

O – Others second

Y – Yourself last

Equals = JOY

Ang saktong matang ug paagi sa paghigugma adunay mag-ubang ganti. Kalipay diha sa kaugalingon ug sa tanan diha katilingban.

pohsiBtebAyU