Marcos 12:38-44

Ang Santos nga Ebanghelyo sumala ni San Marcos 12:38-44 (Sat. June 10, 2023)

Ang dakong panon sa mga tawo madasigon nga namati kang Jesus. Sa Iyang pagtudlo kanila si Jesus miingon, “Pagbantay kamo sa mga magtutudlo sa Balaod nga gustong magsuroysuroy nga magsul-ob ug mga tag-as nga bisti ug buot nga yukboan sulod sa mga merkado. Magpili sila sa mga linaing lingkoranan sulod sa mga sinagoga ug sa mga labing maayong dapit sa mga kombira. Gilupigan nila ang mga biyuda ug gisakmit ang ilang mga katigayonan ug unya nagpasundayag ug tag-as nga mga pag-ampo atubangan sa mga tawo. Makalilisang gayod ang silot nga ilang madawat !” Samtang naglingkod si Jesus atbang sa panudlanan sa Templo, naniid Siya sa mga tawo nga nanghulog didto sa ilang mga halad. Daghang mga dato ang nanghulog ug daghang kuwarta. Unya miduol sa hulganan sa halad ang usa ka biyudang kabos ug mihulog ug duha ka gagmayng salapi nga tumbaga. Gitawag ni Jesus ang Iyang mga tinun-an ug giingnan, “Sultihan Ko kamo nga ang gihulog niining kabos nga biyuda labaw kay sa gipanghulog sa uban. Kay ang gihulog sa uban sobra sa ilang bahandi. Apan bisan sa kakabos sa biyuda, mihatag siya sa tanan nga iya. Gihatag niya ang tanan nga iyang gisaligan aron mabuhi.”

Pamalandong :

KINSA MAN ANG TAWO NGA MAKAPAHIMUOT SA DIOS ?

Gisaway ni Kristo ang mga magtutudlo sa Balaod tungod kay haloyo sa ilang tag-as nga mga pag-ampo, nanlupig sila sa mga biyuda ug nangilog sa ilang mga katigayonan. Para kang Kristo, ang pag-ampo sa mga tawo wala gayoy bili kon sila magdaugdaug o magpahimulos sa ilang isigkaingon. Importante kini nga pahimangno tungod kay daghan kanato maayo lang mosimba, apan sa mga silingan kulang og gugma. Ang makalipay sa Ginoo mao ang tawo nga maampoon ug mahigugmaon. Ang Libro ni Tobit nagtudlo : “Prayer and fasting are good, and so is almsgiving accompanied by righteousness. . . It is better to give alms than to store up gold ; for almsgiving saves one from death and expiates every sin” (12:8).

pohsiBtebAyU