Marcos 12:35-37

 Ang Santos nga Ebanghelyo sumala ni San Marcos 12:35-37 (Fri. June 9, 2023)

Samtang nagtudlo si Jesus didto sa Templo, nangutana Siya, “Nganong nakaingon man ang mga magtutudlo sa Balaod nga ang Mesiyas kaliwat ni David ? Si David, dinasig sa Espiritu Santo, miingon : ‘Ang Ginoo miingon sa akong Ginoo : Lingkod diri sa akong tuo hangtod nga himoon kong tumbanan mo ang imong mga kaaway.’ Si David mismo mitawag Kaniyag ‘Ginoo’; busa unsaon man pagkahimo sa Mesiyas nga kaliwat ni David ?”

Pamalandong :

UNSA MAY ATONG PAGTAN-AW KANG JESUS ? 

Ang mga Hudiyo nagtudlo nga ang Mesiyas tawgo’g “Anak ni David.” Sanglit si David naila nga pinakabantogang hari sa Israel, ang mga Hudiyo nagtuo nga ang muabot nga Mesiyas, sama kang David, maoy mobuntog sa tanan nilang kaaway. Si Jesus mipasabot nga Siya labaw pa sa Anak ni David kay Siya Anak sa Dios, nga mobuntog dili sa mga hari ug sundalo ning kalibotan kondili kang Satanas nga naghari sa kasingkasing sa mga tawo. Sama sa mga Hudiyo, naghunahuna kita nga si Kristo maoy mosulbad sa atong mga problema, apan wala nato Siya tugoti nga maghari sa atong kasingkasing. Adunay pahinumdum nga nagkanayon : “God created a void in your heart that is only His to fill. When life becomes meaningless, boring and hard it’s because we’ve been filling it with anything but Him.”

pohsiBtebAyU