Marcos 12:28-34

 Ang Santos nga Ebanghelyo sumala ni San Marcos 12:28-34 (Thu. June 8, 2023)

Unya didtoy usa ka magtutudlo sa Balaod nga nakabati sa panaglalis nila. Nakita niya nga maayo ang pagkatubag ni Jesus sa mga Saduseo busa miduol siya Kaniya ug nangutana, “Unsa mang sugoa ang labing mahinungdanon sa tanan ?” Mitubag si Jesus, “Mao kini ang labing mahinungdanong sugo : ‘Pamati, Israel ! Ang Ginoo nga atong Dios mao ra gayod ang Ginoo. Kinahanglan nga higugmaon mo ang Ginoo nga imong Dios sa tibuok mong kasingkasing, sa tibuok mong kalag, sa tibuok mong salabotan ug sa tibuok mong kusog.' Ang sunod mao kini : ‘Higugmaa ang imong isigkatawo sama sa imong kaugalingon.’ Wala nay sugo nga labi pang mahinungdanon kay niining duha.” Ang magtutudlo sa Balaod miingon kang Jesus, “Husto kana, Magtutudlo ! Tinuod ang Imong gisulti nga ang Ginoo lamang maoy Dios ug wala nay laing Dios gawas Kaniya. Busa ang tawo kinahanglang mahigugma sa Dios sa tibuok niyang kasingkasing, sa tibuok niyang salabotan, sa tibuok niyang kusog ug kinahanglang higugmaon niya ang iyang isigkatawo sama sa iyang kaugalingon. Mas maayo ang pagtuman niining duha ka sugo kay sa pagdala ug mga mananap nga sunogon ibabaw sa halaran ug sa paghatag ug ubang mga halad ngadto sa Dios.” Nakamatikod si Jesus nga maalamon kaayo ang tubag sa maong magtutudlo sa balaod busa miingon Siya kaniya, “Dili ka halayo sa gingharian sa Dios.” Ug wala na gayoy nangahas pagpangutana Kaniya.

Pamalandong :

UNSA MAY NINDOT NGA HALAD PARA SA GINOO ? 

Ang Ebanghelyo nagtudlo nga ang halad nga makalipay sa Dios dili ang kwarta o butang nga atong dalhon sa altar, kondili ang paghigugma Kaniya sa tibuok natong kasingkasing, hunahuna ug kusog, ug ang paghigugma sa isigkaingon sama sa paghigugma sa kaugalingon. Sa ato pa diay, ang atong kwarta o butang nga dalhon sa simbahan mahimo lamang nga bililhon kon sa inadlaw-adlaw natong pagkinabuhi aduna kitay panahon para sa Ginoo ug aduna kitay pagbati para sa Ginoo ug para sa atong isigkatawo. Nindot ang pahimangno ni Pope Francis, " Loving God means serving our neighbour without reserve, and trying to forgive without limits."

pohsiByebAyU