Juan 6:51-58

 Ang Santos nga Ebanghelyo sumala ni San Juan 6:51-58 (Sun. June 11, 2023 Solemnidad Sa Lawas Ug Dugo Ni Kristo)

Ako mao ang pan nga gikan sa langit nga naghatag sa kinabuhi. Ang mokaon niini nga pan dili gayod mamatay. Ug ang pan nga Akong ihatag mao ang Akong unod aron mabuhi ang kalibotan.” Nakahaling kini ug mainit nga paglalisay sa mga tawo. “Unsaon man niining Tawhana paghatag kanato sa Iyang unod aron kan-on ?” Si Jesus miingon kanila, “Sultihan Ko kamo : kon dili kamo mokaon sa unod sa Anak sa Tawo ug dili moinom sa Iyang dugo, dili kamo makabaton ug kinabuhi. Ang mokaon sa Akong unod ug moinom sa Akong dugo may kinabuhing walay kataposan ug banhawon Ko siya sa kataposang adlaw. Kay ang Akong unod mao ang matuod nga pagkaon ug ang Akong dugo mao ang matuod nga ilimnon. Ang mokaon sa Akong unod ug moinom sa Akong dugo magpabilin dinhi Kanako ug Ako diha kaniya. Ang buhing Amahan maoy nagpadala Kanako ug tungod Kaniya buhi usab Ako. Sa samang paagi, ang mokaon Kanako mabuhi tungod Kanako. Busa mao kini ang pan nga mianhi gikan sa langit. Dili kini sama sa pan nga gikaon sa inyong mga katigulangan ug unya nangamatay gihapon. Ang mokaon niining maong pan mabuhi sa dayon.”

Pamalandong :

NAGTOO KA BA SA TINOOD NGA ANG PRESENSYA NI KRISTO ANAA DIHA SA PAN UG BINO SA EUKARISTIYA ? O, NAGTOO KA LANG NGA ANG PAN UG BINO SA SANTOS NGA MISA SIMBOLO  RA SA PRESENSYA SA DIOS ?

Diha sa Ebanghelyo, si Kristo namulong : “Ako mao ang buhing pan nga gikan sa langit. Ang mokaon ning maong pan makabaton sa kinabuhing walay katapusan ; ug ang pan nga Akong ihatag alang sa kinabuhi sa kalibutan mao ang Akong unod.”  Ang mga Hudiyo nga naminaw kang Jesus dili makatoo sa ilang nadungog. Nagbagolbol sila : “Unsaon man ning Tawhana paghatag sa Iyang unod aron atong makaon ?” Tingali sa ilang kahiladman nakaingon sila, “Basin nagtoo ning tawhana nga mangan-anay kita’g tawo.” Tungod sa gipamulong ni Jesus, daghan sa mga tinun-an nihunong sa pagsunod Kaniya.

Apan, bisan tuod daghan sa iyang mga sumusunod ang nawad-ag pagtoo Kaniya, gibarogan ni Jesus ang Iyang mga pulong. Wala Siya moingon : “Pasayloa Ko ninyo kon naglabad ang inyong ulo sa Akong gisulti. Ang buot Nakong ipasabut mao nga ang pan maoy simbolo sa Akong pagkatawo. Dili nako tuyo nga sugoon kamo sa pagkaon sa Akong unod.” Wala Niya usba ang Iyang gisulti. Gani, Iya pang gipangusgan ang Iyang mga pulong : “Kini ang labing tinuod, kon dili kamo mokaon sa unod sa Anak sa Tawo ug moinum sa Iyang dugo, dili kamo makabaton og kinabuhi. Ang mokaon sa Akong unod ug moinum sa Akong dugo makabaton sa kinabuhing dayon, ug banhawon Ko sila sa katapusang adlaw ; kay ang Akong unod tinuod nga pagkaon ug ang Akong dugo tinuod nga ilimnun.” 

Ang Simbahan nagtudlo sa kahulugan ning mga Pulong ni Jesus diha sa konteksto sa Eukaristiya. Giisip ni Jesus ang Iyang kaugalingon isip kordero nga ihalaray alang sa kapasayloan sa mga sala sa tawo. Didto sa Katapusang Panihapon, gipaklaro Niya ang Iyang gitudlo : “Dawata ninyo kini ug kan-a, kini mao ang Akong lawas”; “Panginum kamo gikan niini ; kay kini mao ang Akong dugo sa bag-ong kasabutan, nga giula alang sa kapasayloan sa mga sala.” Ang mga sumusunod gimanduan ni Kristo nga saulogon ang Eukaristiya alang sa Iyang handumanan aron nga ang tanang katawhan sa tanang panahon makatagamtam sa bunga sa makaluwas Niyang sakripisyo. Unsa may hagit ning maong Ebanghelyo kanato karon ? Kini nagdasig kanato sa pagpalawom sa atong pagsabut ug pagtoo sa presensya ni Kristo diha sa pan ug bino sa Eukaristiya. Dili na kita angay’ng magduhaduha pa tungod kay si Kristo mismo mao ang nag-ingon niini. Atong ipakita ang dakong pagtoo sa Eukaristiya diha sa atong pag-andam sa kaugalingon sa pagdawat niini sa matag higayon nga kita mosimba. Kon limpiyo ang atong konsensya sa pagdawat ni Jesus diha sa pan ug bino, mabusog ug mahimsog ang atong kinatibuk-ang pagkatawo. Makabaton kita’g tinuod nga kalinaw, kalipay ug kinabuhi sumala sa gisaad ni Kristo.

Dugang pa niini, atong ipakita ang dakong pagtoo sa presensya ni Jesus diha sa Eukaristiya pinaagi sa paghatag og dakong pagtahud sa sagrado nga pan ug bino. Atubangan sa Santos nga Eukaristiya, angay gayod nga kita moluhod ug moyukbo tungod kay anaa kita atubangan sa Dios. Sa dalan sa kalbaryo, ang Ginoo nadagma ug napaluhod sa makadaghan tungod ug alang sa Iyang dakong gugma sa katawhan. Angay lamang usab nga kita moluhod sa Iyang atubangan aron sa pagdayeg ug pagpasalamat Kaniya.

Adunay sugilanon sa usa ka magtotoo nga samtang naglakaw kuno sa dalan ang duha ka managhigala nga Muslim ug Kristiyano, ilang gikahinagbo ang usa ka pari nga nagdalag Santos nga Eukaristiya para sa usa ka masakiton. Ang Kristiyano mihunong, mitangtang sa iyang kalo ug miluhod. Nahibulong ang Muslim nga nagsud-ong kaniya ug nangutana sa hinungdan sa iyang gibuhat. “Akong gisimba ang akong Ginoo nga gidala sa pari ngadto sa usa ka masakiton”, mipasabut ang Kristiyano. Unya miingon ang Muslim : “Sa unsa mang hitaboa nga ang Labing Gamhanang Dios magpakahimong gamay kaayo nga pan ug magpaubos sa Iyang kaugalingon pinaagi sa pagduaw sa usa ka pobreng masakiton ? Pasayloa ko higala, pero mas dako ang among pag-ila ug pagtahud sa Ginoo kaysa inyoha.” Ug ang Kristiyano mitubag : “Tungod kana kay ang inyong nailhan sa Ginoo mao lamang ang iyang pagkagamhanan, pero wala kamo makasabut sa kadako sa Iyang gugma para sa tawo.”

Ug sa katapusan, atong ipadayag ang kahulogan sa Eukaristiya diha sa inadlaw-adlaw natong pagpuyo. Sa atong pagkalawat ni Kristo, kita nahiusa Kaniya. Matud pa Niya : “Ang mokaon sa Akong unod ug moinum sa Akong dugo magpuyo dinhi Kanako ug Ako diha kaniya.” Kining misteryosong kamatuoran magdasig unta kanato sa pagkahimong susama ni Kristo sa hunahuna ug kasingkasing, sa pulong ug sa buhat. Diha sa Eukaristiya adunay lawas nga gipikaspikas ug adunay dugo nga giula alang sa kaluwasan sa uban. Kita nga mikalawat kang Kristo gidasig nga mahimo usab nga Eukaristiya alang sa katawhan. Makat-on unta kita sa pagpaambit sa atong kaugalingon ug sa pagsakripsiyo alang sa kaayohan sa isigkatawo. Kon ato kining mahimo, matagamtam nato ang Diosnong kinabuhi nga gipaambit ni Kristo.

pohsiBtebAyU