San Lukas 1:26-38

 Ang Santos nga Ebanghelyo sumala ni San Lukas 1:26-38 /San Juan 19:25-27 / San Juan 2:1-11 (Mon. May 29, 2023)

Sa unom na ka bulan ang gisabak ni Elisabet, gipadala sa Dios ang anghel nga si Gabriel ngadto sa usa ka lungsod sa Galilea nga ginganla'g Nazaret. May mensahe Siya alang sa usa ka batan-ong dalaga nga ulay nga ginganla'g Maria. Kaslonon siya ngadto sa usa ka lalaki nga ginganla'g Jose nga kaliwat ni Hari David. Miadto ang anghel kaniya ug miingon, “Paglipay ! Ang Ginoo nag-uban ug nagpanalangin kanimo pag-ayo !” Nalibog pag-ayo si Maria sa pagkabati niya sa mensahe sa anghel ug namalandong siya kon unsay kahulogan sa iyang mga pulong. Miingon ang anghel kaniya, “Ayaw kahadlok, Maria, kay gikahimut-an ka sa Dios ! Ikaw magsabak ug manganak ug usa ka batang lalaki ug nganlan mo Siya'g Jesus. Mahimo Siyang inila ug tawgon Siya nga Anak sa Dios nga Labing Halangdon. Ang Ginoong Dios maghimo Kaniyang hari, sama sa Iyang kagikan nga si David. Mahimo Siyang hari sa mga kaliwat ni Jacob hangtod sa kahangtoran ug dili gayod matapos ang Iyang gingharian !”Si Maria miingon sa anghel, “Unsaon man pagkahimo niini nga wala man koy bana ?” Ang anghel mitubag, “Mokunsad kanimo ang Espiritu Santo ug magpabilin ang gahom sa Dios diha kanimo. Tungod niini, ang balaan nga bata tawgon nga Anak sa Dios. Hinumdomi ang imong paryenti nga si Elisabet. Giingon nga dili siya makaanak apan karon unom na ka bulan ang iyang pagsabak bisag tigulang na siya kay alang sa Dios walay dili mahimo.” Miingon si Maria, “Sulugoon ako sa Ginoo. Mahitabo unta kanako ang imong gisulti.” Ug mibiya ang anghel kaniya.

Pamalandong :

KINSA MAN SI MARIA PARA KANATO ? 

Ang titulo nga 'Inahan sa Simbahan' (Mater Ecclesiae) gihatag ngadto sa Mahal nga Birhen Maria ni Pope Paul VI. Giproklamar ni Pope Francis ang kapistahan ni Maria Inahan sa Simbahan nga saulogon sa Lunes human sa Pentecostes. Ang Catechism of the Church nag-ingon nga "ang papel ni Maria sa Simbahan dili mabulag gikan sa iyang pagkahiusa kang Kristo ug gikan niini" (CCC #964). Gisalig ni Jesus ang Iyang minahal nga disipulo nga si Juan ngadto kang Maria ug miingon, “Babaye, tan-awa ang imong Anak.” Iyang gitugyan si Maria kang Juan nga nag-ingon, “Anak, tan-awa ang imong inahan.” Si Juan ang minahal nga disipulo nagrepresentar sa katawhan ug sa mga matuuhon ug busa si Maria nahimong inahan ni Juan, sa mga Apostoles, ug sa Simbahan. Siya ang inahan sa Manluluwas, si Jesus. Aktibo usab siyang miapil sa pag-ampo alang sa pagkahimugso sa Simbahan sa Pentecostes uban sa mga Apostoles sa Ibabaw nga Lawak (CCC #965). Sa tanan, mapaubsanon siyang nakigtambayayong sa plano sa Dios nga mahimong inahan sa manluluwas ug inahan sa iyang lawas, ang Simbahan. Ang iyang espirituwal nga mga anak, ang mga matinumanon, dili ba mosundog sa iyang mga hiyas sa pagkamapainubsanon ug bug-os nga paghatag sa kaugalingon ngadto sa mga plano sa Diyos ?

Sa laing bahin usab, Si Maria gitawag pud nga rayna tungod sa iyang pagka-inahan sa Anak sa Dios. Si Jesus, nga maoy hari sa tanang hari, nagpuyo og ordinaryong kinabuhi. Ang Iyang pagka-hari gidayandayanan sa mga hiyas sa pagkamapaubsanon ug pagkamaalagaron. Ingon usab niini ang atong makita kang Maria. Ang Iyang “pagkabulahan sa mga babayeng tanan” wala makapadako sa Iyang ulo. Nasayod si Maria nga Siya sulugoon lamang sa Dios, ug tungod niini, nagpabilin Siyang mapaubsanon ug maalagaron. Siya ang nagmatuod sa giingon sa Iyang Anak : “Si bisan kinsa kaninyo nga gustong mahimong dako, kinahanglan nga mag-alagad sa tanan.” Sakto ang giingon ni Martin Luther King, Jr.: “Not everybody can be famous but everybody can be great because greatness is determined by service.”

pohsiBtebAyU