Mateo 28:8-15

 Ang Santos nga Ebanghelyo sumala ni San Mateo 28:8-15  (Mon. Apr. 10, 2023)

Busa midali sila pagbiya sa lubnganan nga may kahadlok uban ang dakong kalipay. Nanagan sila aron pagbalita sa Iyang mga tinun-an. Unya sa kalit misugat si Jesus kanila ug miingon, “Ang kalinaw mag-uban kaninyo.” Miduol sila Kaniya ug mihikap sa Iyang mga tiil ug misimba Kaniya. Si Jesus miingon kanila, “Ayaw kamo kahadlok ; adtoa ang Akong kaigsoonan ug paadtoa sila sa Galilea. Didto makita nila Ako.” Samtang nanglakaw ang mga babaye, pipila sa mga sundalo nga nagbantay sa lubnganan namauli sa siyudad ug gisuginlan nila ang kadagkoan sa mga pari sa tanan nga nahitabo. Unya ang kadagkoan sa mga pari nakigtagbo sa mga pangulo sa mga Judio aron pagplano sa ilang buhaton. Ug ang mga sundalo gihatagan nila ug daghang kuwarta ug giingnan, “Ipanugilon ninyo nga sa pagkagabii ang Iyang mga tinun-an miadto sa lubnganan ug gikawat nila ang Iyang lawas samtang nangatulog kamo. Ug kon kini mahibaw-an sa Gobernador, kami nay mag-igo pagsulti kaniya ug wala na kamoy angay  kabalak-an.” Gidawat sa mga guwardiya ang kuwarta ug ilang gituman ang gisugo kanila. Hangtod karon mao kini ang balita nga gipakaylap sa mga Judio.

Pamalandong :

KINSA MAY ANGAY TAHASAN SA BUHAT SA PAGSANGYAW – ANG MGA BABAYE BA O MGA LALAKI  ? 

Ang mga Hudeyo walay pagsalig sa mga pulong sa usa ka babaye ; dili gani nila dawaton ang testimoniya niini diha sa ilang mga korte. Mao kini ang gitawag og “prejudice against women.” Apan diha sa Ebanghelyo, si Kristo mipili'g mga babaye isip unang magsasangyaw sa Iyang Pagkabanhaw ngadto sa uban. Sa ato pa, wala diay sa pagka-babae o pagka-lalaki ang basihan kon kinsay angay saligan. Si Kristo nagdapit kanatong tanan nga mahimong Iyang magsasangyaw sa kalibotan. Si Pope Francis mipasabot niini : “To evangelize is to make the kingdom of God present in our world. Jesus wants evangelizers who proclaim the good news not only with words, but above all by a life transfigured by God’s presence.”

pohsiBtebAyU