Juan 6:52-59

 Ang Santos nga Ebanghelyo sumala ni San Juan 6:52-59 (Fri. Apr. 28, 2023)

Nakahaling kini ug mainit nga paglalisay sa mga tawo. “Unsaon man niining Tawhana paghatag kanato sa Iyang Unod aron kan-on ?” nangutana sila. Si Jesus miingon kanila, “Sultihan Ko kamo : kon dili kamo mokaon sa Unod sa Anak sa Tawo ug dili moinom sa Iyang Dugo, dili kamo makabaton ug kinabuhi. Ang mokaon sa Akong Unod ug moinom sa Akong Dugo may kinabuhing walay kataposan ug banhawon Ko siya sa kataposang adlaw. Kay ang Akong Unod mao ang matuod nga pagkaon ug ang Akong Dugo mao ang matuod nga ilimnon. Ang mokaon sa Akong Unod ug moinom sa Akong Dugo magpabilin dinhi Kanako ug Ako diha kaniya. Ang buhing Amahan maoy nagpadala Kanako ug tungod Kaniya buhi usab Ako. Sa samang paagi, ang mokaon Kanako mabuhi tungod Kanako. Busa mao kini ang Pan nga mianhi gikan sa langit. Dili kini sama sa pan nga gikaon sa inyong mga katigulangan ug unya nangamatay gihapon. Ang mokaon niining maong Pan mabuhi sa dayon.” Gisulti kini ni Jesus samtang nagtudlo Siya didto sa sinagoga sa Capernaum.

Pamalandong :

ANG KONSAGRADO NGA PAN UG BINO DIHA SA SANTOS NGA MISA – SIMBOLO O PRESENSYA SA DIOS ? 

Daghan ang maghunahuna (apil ang mga Katoliko nga wala makasabot) nga ang sagrado nga Ostiya “simbolo” lamang sa presensya sa Dios. Apan sayop kini nga pagtoo. Ang kamatuoran mao nga si Jesus tinuod gayod nga anaa sa Ostiya ug Bino nga gikonsagrahan sulod sa Misa. Sa Katapusang Panihapon, Siya miingon samtang mitunol sa pan ug bino, “Kini mao ang Akong Lawas... Kini mao ang Akong Dugo” (1 Cor 11:24-25). Wala gayod Siya moingon nga kini mao ang simbolo sa Akong Lawas ug Dugo. Diha sa Ebanghelyo karon, si Kristo namulong, “Ang Akong Unod mao ang matuod nga kalan-on, ug ang Akong Dugo mao ang matuod nga ilimnon.” Kini ang misteryo sa Eukaristiya nga gihuptan sa Katolikong Simbahan. Matod pa ni San Agustin," What you see is the bread and the chalice; that is what your own eyes report to you. But what your faith obliges you to accept is that the bread is the Body of Christ and the chalice is the Blood of Christ. This has been said very briefly, which may perhaps be sufficient for faith ; yet faith does not desire instruction."

pohsiBtebAyU