Juan 3:16-21

 Ang Santos nga Ebanghelyo sumala ni San Juan 3:16-21 (Wed. Apr. 19, 2023)

Kay gihigugma pag-ayo sa Dios ang kalibotan ug tungod niini gihatag Niya ang Iyang bugtong Anak, aron ang tanan nga motuo Kaniya dili malaglag kondili makabaton hinuon sa kinabuhing dayon. Kay wala ipadala sa Dios ang Iyang Anak nganhi sa kalibotan aron pagsilot kondili aron pagluwas niini. Ang tanan nga motuo sa Anak dili silotan. Apan kadtong dili motuo Kaniya gisilotan na kay wala man siya motuo sa bugtong Anak sa Dios. Ug kini mao ang silot : ang kahayag mianhi sa kalibotan apan gipalabi sa mga tawo ang kangitngit kay sa kahayag, kay daotan man ang ilang binuhatan. Ug ang tanan nga nagbuhat ug daotan dili gusto sa kahayag ug dili moduol niini kay dili siya buot nga mabutyag ang iyang daotang binuhatan. Apan ang magbuhat sumala sa kamatuoran moduol sa kahayag aron makita nga nagmatinumanon siya sa Dios.

Pamalandong :

UNSA MAY MAGDALA SA TAWO NGADTO SA KALUWASAN ? 

Naanad kitang maghunahuna nga aron makasulod sa langit kinahanglan maghimo kita’g mga maayong buhat. Kini ang gitudlo kanato sukad pa sa atong pagkabata. Bisan tuod adunay kamatuoran kining maong pagtulon-an, aduna usab kini kakulangon. Kini maoy makaingon sa pagsabot nga ang kaluwasan usa ka butang nga atong makab-ot tungod sa atong kaugalingong paningkamot. Ug ang uban pwedeng mahimong mapasigarbohon tungod sa pagbuhat og maayo. Si San Pablo nagpahinumdum kanato nga ang kaluwasan usa ka Grasya sa Dios. Ang Dios maoy nilihok pag-una, Siya ang nagpadala sa Iyang Bugtong Anak aron pagluwas kanato. Busa, angay kitang magmapasalamaton, dili magmapasigarbohon, sa kaluwasan nga atong naangkon. Matod pa ni Mark Alan Williams, " People don’t go to heaven as a result of living good or morally upright lives, but only because they have admitted they are sinners in need of forgiveness and have accepted Jesus Christ as their personal Lord and Savior."

pohsiBtebAyU