Juan 20:19-31

 Ang Santos nga Ebanghelyo sumala ni San Juan 20:19-31 (Sun. Apr. 16, 2023 Ikaduhang Domingo Sa Pagkabanhaw)

Sa pagkakilomkilom na niadtong adlawa nga maoy unang adlaw sa semana nagtigom ang mga tinun-an ug gitrangkahan nila ang pultahan kay nahadlok man sila sa kadagkoan sa mga Judio. Unya mitungha si Jesus sa taliwala nila ug miingon, “Mainyo ang kalinaw.” Human Siya makasulti niini, Iyang gipakita kanila ang Iyang mga kamot ug ang Iyang kilid. Nalipay pag-ayo ang mga tinun-an sa ilang pagkakita sa Ginoo. Unya si Jesus miingon kanila pag-usab, “Mainyo ang kalinaw. Ingon nga gipadala Ako sa Amahan, Ako usab nagpadala kaninyo.” Gisulti Niya kini ug unya gihuypan Niya sila ug giingnan, “Dawata ninyo ang Espiritu Santo. Kon pasayloon ninyo ang mga sala sa mga tawo, gipasaylo kini. Kon dili ninyo pasayloon ang ilang mga sala, dili usab kini pasayloon.” Si Tomas nga ginganlag Kaluha, usa sa 12 ka tinun-an, wala mahiuban kanila sa pag-anha ni Jesus. Busa gisuginlan siya sa ubang mga tinun-an, “Nakita namo ang Ginoo !” Si Tomas miingon kanila, “Gawas kon makita ko ug ikabutang ang akong tudlo sa inagian sa mga lansang diha sa Iyang kamot ug mahikap ko ang samad sa Iyang kilid, dili ako motuo.” Human molabay ang usa ka semana, nagtigom na usab ang mga tinun-an sulod sa lawak ug uban na kanila si Tomas. Gitrangkahan ang mga pultahan apan mitungha si Jesus ug mitindog sa taliwala nila ug miingon, “Mainyo ang kalinaw.” Unya miingon siya kang Tomas, “Tan-awa ang Akong kamot ug hikapa kini. Hikapa usab ang samad sa Akong kilid. Tuo ug ayaw na pagduhaduha !” Si Tomas miingon Kaniya, “Ginoo ko ug Dios ko !” Unya miingon si Jesus kaniya, “Mituo ka ba tungod kay nakakita ka Kanako ? Bulahan kadtong motuo bisan wala makakita Kanako !” Ug daghan pang mga milagro nga gibuhat ni Jesus sinaksihan sa Iyang mga tinun-an nga wala nasulat niining basahona. Apan gisulat kini aron kamo motuo nga si Jesus mao ang Mesiyas, ang Anak sa Dios, ug pinaagi sa maong pagtuo makabaton kamo ug kinabuhi diha sa Iyang ngalan.

Pamalandong :

UNSAON MAN NATO PAGDAWAT SA GUGMA, KALOOY UG PASAYLO SA GINOO ? 

Sa dihang ang Nabanhaw’ng Ginoo nagpakita sa Iyang mga tinun-an, gihatag Niya kanila ang tulo ka butang : Kalinaw, Misyon, ug Gahum sa pagpasaylo sa mga sala.

Una, gitunol sa Nabanhaw’ng Jesus ang gasa sa kalinaw ngadto sa mga tinun-an. Nasayod Siya nga ang Iyang mga sumusunod gihari-an sa kalisang. Nagtago sila gikan sa mga Hudiyo tungod kay nahadlok sila nga mahisama og sangpotan Kaniya. Nahibalo usab si Jesus nga ang mga tinun-an naulaw sa ilang gibuhat nga pagbiya Kaniya didto sa kalbaryo sa Jerusalem. Pagkanindot siguro paminawon sa mga apostoles ang mga pulong ug pagtimbaya ni Jesus nga nag-ingon : “Ang kalinaw maanaa kaninyo !” Sa katilingban sa mga Hudiyo, ang pulong “kalinaw” maoy pinakabililhong pagtimbaya nga mahatag sa usa ka tawo ngadto sa lain. Usa kini ka panghinaot alang sa kaayohan, materyal ug espiritwal, sa tawo nga gitimbaya. Dinhi nato masabtan ang kaayo ug kamapasayloon ni Kristo. Human Siya gibudhi-an, gilimod ug gibiya-an sa Iyang mga tinun-an, nagpadayon Siya sa pagpangita kanila ug pagtunol kanila'g kalinaw. Kasagaran kanato, mohunong na og tagad sa mga tawo nga nakapasakit kanato. Usahay gani, ato silang panghimaraoton ug iampo nga adunay daotan nga mahitabo kanila tungod kay gusto man kita nga makabalos kanila. Ang ehemplo nga gipakita ni Kristo angay nga magdasig kanato sa pag-ampo alang sa kaayohan sa atong mga kaaway ug sa mga tawo nga nakahatag kanatog kasakit.

Ikaduha, ang Nabanhaw’ng Ginoo nipaambit sa mga tinun-an og misyon, nga Iya usab nga nadawat gikan sa Langitnong Amahan : “Sama nga ang Amahan nagpadala Kanako, Ako usab magpadala kaninyo” (Juan 20:21). Sa kinatibuk-an, ang misyon mao ang pagsangyaw ug pagpabati sa gugma ug kalooy sa Dios ngadto sa tanang katawhan. Ang Ebanghelyo nagkanayon : “Ang Dios wala magpadala sa Anak aron paglaglag sa kalibotan, kondili aron nga ang kalibotan maluwas pinaagi Kaniya” (Juan 3:17). Gituman ni Jesus ang Iyang misyon sa pagpabati sa dakong gugma sa Dios ngadto sa mga tawo pinaagi sa Iyang libre, matinud-anon ug malangkubong pagpangalagad. Unya, Iya kining gikumpleto pinaagi sa paghalad sa Iyang kinabuhi didto sa krus agi’g bayad sa mga sala sa katawhan. Ang mga samad sa mga kamot ug kilid ni Jesus maoy nahimong ilhanan sa dakong sakripisyo nga gihimo ni Kristo alang sa tanan. Usa kini ka pagpakita nga gihigugma Niya ang tawo kutob sa katapusan. Sa wala pa Siya nibalik ngadto sa Iyang Amahan, gibilin ni Jesus ang misyon sa gugma ug pagpangalagad ngadto sa Iyang mga sumusunod. Ang unang pagbasa nagsaysay giunsa sa mga apostoles paghimog mga timaan ug milagro sa ngalan ni Jesu-Kristo. Ang mga tawo nagdala sa ilang mga masakiton  ngadto sa mga apostoles bisag galisod ug silang tanan nangaayo (Buhat 5:16). Tungod niini, ang mga tawo nitoo kanila, ug daghan ang nadasig sa pag-apil sa Kristohanong katilingban. Kining maong pagbasa angay nga maghagit kanato sa paghatag og nindot nga pagtagad sa  mga naglisod tang mga kaigsoonan, ilabina ang mga masakiton ug maluyahon. Ang matinud-anon nga pag-atiman sa mga kabos ug timawa maoy maghatag og dakong kredibilidad sa Simbahan ug sa mga tinun-an ni Jesus.

Ug sa katapusan, ang Nabanhaw’ng Ginoo naghatag sa mga tinun-an og gahum sa pagpasaylo sa mga sala. “Gihuypan Niya sila ug giingnan : Dawata ninyo ang Espiritu Santo. Kon pasayloon ninyo ang mga sala sa mga tawo, gipasaylo kini ; kon ang ilang mga sala dili ninyo pasayloon, dili usab kini pasayloon” (Juan 20:23). Atong mabasa sa Balaang Kasulatan nga sa dihang gihimo sa Dios ang unang tawo gihuypan Niya ang buho sa ilong niini sa Espiritu sa kinabuhi, ug ang tawo nahatagan og kinabuhi (Genesis 2:7). Sa samang paagi, gihuypan sa Nabanhaw’ng Ginoo ang mga tinun-an ug sila nahimong bag-ong mga tawo nga adunay talagsaong katakos sa paghigugma ug pagpasaylo sa usag-usa. Ang pagpasaylo anaa sa sentro sa mensahe ni Jesus ug kini apil gayod sa Iyang katapusang mga sugo sa mga tinun-an. Ang mga tinun-an maoy unang nakatagamtam sa kapasayloan sa Dios ; sila usab ang gitahasan sa pag-una sa paghatag og kapasayloan sa mga sala sa matag tawo. Sumala sa kasinati-an, dili sayon ang pagpasaylo og laing tawo, ilabina gayod kon kita nasakitan pag-ayo. Apan, karon gipahinumduman kita nga ang Nabanhaw’ng Ginoo naghatag na kanato'g talagsaong grasya ug kusog sa pagpasaylo og tawo. Tungod kay kita usa man ka katawhan nga gipasaylo, dili gayod angay nga modumili kita sa pagpasaylo sa uban. Matod pa ni Papa Francisco, "Forgiveness is the essence of the love which can understand mistakes and mend them. How miserable we would be if God did not forgive us ! Within the family we learn how to forgive, because we are certain that we are understood and supported, whatever the mistakes we make."

pohsiBtebAyU