Juan 20:11-18

 Ang Santos nga Ebanghelyo sumala ni San Juan 20:11-18 (Tue. Apr. 11, 2023)

Apan si Maria nagtindog nga naghilak didto sa gawas sa lubnganan. Unya miyuko siya aron paglili sa lubnganan ug nakita niya didto ang duha ka anghel nga nagbistig puti ug naglingkod sa dapit nga nahimutangan sa lawas ni Jesus. Ang usa didto dapit sa ulohan ug ang usa dapit sa tiilan. “Babaye, nganong naghilak ka man ?” sila nangutana kaniya. Si Maria mitubag, “Ila man gud nga gikuha ang akong Ginoo ug wala ako mahibalo kon hain nila ibutang Siya !” Sa pagkahuman niyag sulti niini, milingi siya ug iyang nakita si Jesus nga nagbarog didto apan wala siya makaila nga si Jesus diay kadto. “Babaye, nganong naghilak ka man ?” nangutana si Jesus kaniya. “Kinsa man ang imong gipangita ?” Nagtuo si Maria nga Siya mao ang hardinero, busa miingon siya Kaniya, “Kon Ikaw maoy nagkuha Kaniya, tug-ani ako kon hain Mo Siya ibutang kay kuhaon ko Siya.” Si Jesus miingon kaniya, “Maria !” Ug si Maria miatubang kang Jesus ug miingon sa Hebreo, “Rabboni !” (nga sa ato pa, “Magtutudlo.”) Unya giingnan siya ni Jesus, “Ayaw Akog hikapa kay wala pa Ako makabalik sa Amahan. Adtoa hinuon ang Akong kaigsoonan ug suginli sila nga moadto Ako sa Akong Amahan ug inyong Amahan, sa Akong Dios ug inyong Dios.” Busa gisuginlan ni Maria Magdalena ang mga tinun-an nga nakakita siya sa Ginoo ug gisaysay niya kanila ang gisulti ni Jesus kaniya.

Pamalandong :

UNSA MAN KABILILHON ANG ATONG PANGALAN UG PAGKATAWO ? 

Diha pa nailhi ni Maria Magdalena ang Nabanhaw'ng Ginoo sa dihang gitawag siya ni Jesus ginamit ang iyang ngalan nga “Maria”. Tinuod gayod ang panultihon nga nag-ingon, “A person’s name is to that person the sweetest sound of all.” Ang Salmo (147:4) nagsangyaw nga ang Dios nasayod sa gidaghanon sa kabitoonan ug tagsatagsa kanila gihatagan Niyag ngalan. Apan labaw niini, ang libro ni Isaias (49:16) nagmatuod nga ang pangalan sa matag tawo nahisulat sa mga palad sa Dios. Ingon niana kanindot ang pag-ila sa Dios sa matag usa kanato. Giingnan sa Nabanhaw’ng Kristo si Maria nga kining Dios diin Siya mopauli mao ang atong Dios ug Amahan. Kining mga kamatuoran angayng magdasig kanato sa paghatag og dakong bili sa atong kaugalingon isip mga anak sa Dios. 

Adunay tradisyon sa simbahan nga nagtawag kang Maria Magdalena nga “Apostola Apostolorum” (Apostoles sa mga Apostoles) tungod kay siya man ang gipadala aron pagpahibalo sa mga apostoles nga nabanhaw ang Ginoo. Kining kamatuoran angay’ng maghagit sa Simbahan sa pag-ila sa dakong papel sa mga babaye diha sa buhat sa pagsangyaw, pagbalaan ug pagpangulo sa katawhan.

pohsiBtebAyU