Juan 8:1-11

 Ang Santos nga Ebanghelyo sumala ni San Juan 8:1-11 (Mon. Mar. 27, 2023)

Unya ang tanan namauli apan si Jesus miadto sa Bungtod sa mga Olibo. Sayo sa pagkabuntag mibalik Siya sa Templo. Mialirong Kaniya ang mga tawo ug milingkod Siya ug nanudlo kanila. Ang mga magtutudlo sa Balaod ug ang mga Pariseo nagdalag usa ka babaye nga hisakpan nga nanapaw ug siya gipaatubang nila sa tanan. Miingon sila kang Jesus, “Magtutudlo, kining babayhana nasakpan nga nanapaw. Sa atong Balaod nagsugo si Moises nga ang magbuhat sa ingon kinahanglan batoon hangtod mamatay. Karon, unsa may Imong ikasulti ?” Gisulti nila kini aron pagbitik Kaniya ug sa ingon ikasumbong nila Siya. Apan mitikubo si Jesus ug misulat sa yuta ginamit ang Iyang tudlo. Ug samtang nagbarog sila didto nga nangutana, mituyhad si Jesus ug miingon kanila, “Bisag kinsa kaninyo nga wala makasala maoy paunaha pagbato kaniya.” Unya misulat Siya pag-usab sa yuta. Sa pagkadungog nila sa gisulti ni Jesus, nag-iyahay silag pamahawa ug nag-una ang mga tigulang. Nahibilin si Jesus ug ang babaye nga nagbarog gihapon didto. Si Jesus mituyhad ug miingon kaniya, “Hain na man sila ? Wala bay nagpabilin aron pagsilot kanimo ? “Wala, sir,” siya mitubag. Si Jesus miingon kaniya, “Kon mao kana, bisan Ako dili usab mosilot kanimo. Lakaw ug ayaw na pagpakasala.”

Pamalandong :

NGANONG DILI MAN KITA ANGAY NGA MAGHUKOM OG TAWO ? 

Adunay panultihon nga nagkanayon, “Judging a person does not define who they are. It defines who you are.” Ang kahulogan ning panultihon nadayag pag-ayo diha sa Ebanghelyo karon. Ang mga magtutudlo sa Balaod ug mga Pariseo nagdala ngadto kang Jesus og usa ka babayeng nasakpan nga nanapaw. Gusto nila nga kondenahon dili lang ang babaye kondili apil si Jesus nga para kanila usa ka tampalasan. Apan sa kaulahi-an, ang napamatud-an dili ang sala sa babaye o ang sayop ni Jesus kondili ang ilang daotang pagkatawo. “Bisan kinsa kaninyo nga wala makasala maoy paunaha pagbato kaniya.” Sa pagsulti niini, gipaamgo ni Jesus sa mga naminaw kaniya nga walay usa kanila ang may katungod sa pagkondena og laing tawo tungod kay sila mga makasasala man usab. Sakto ang tambag nga nagkanayon, "Judgement prevents us from seeing the good that lies beyond appearances.”

pohsiBtebAyU