Mateo 9:14-15

 Ang Santos nga Ebanghelyo sumala ni San Mateo 9:14-15 (Fri. Feb. 24, 2023)

Unya miadto kang Jesus ang mga tinun-an ni Juan nga Magbubunyag ug nangutana, “Nganong kami ra man ug ang mga Pariseo ang nagpuasa kanunay apan ang Imong mga tinun-an wala ?” Si Jesus mitubag, “Naghunahuna ba diay kamo nga magsubo ang mga dinapit sa kombira sa kasal samtang ang pamanhonon uban pa kanila ? Dili gayod ! Apan moabot ang panahon nga ang pamanhonon kuhaon gikan kanila ug magpuasa na unya sila.

Pamalandong :

UNSA MAN KABILILHON ANG PAGPUASA ? 

Ang pagpuasa usa ka dalaygong buhat, ilabina kon kini himoon uban sa maayong katuyoan ug dili pakitang-tao lamang. Ang pagpuasa mao ang pagdisiplina sa kaugalingon pinaagi sa pagpugong sa pagkaon, pag-inum, o paglingawlingaw. Mahimo kining makahuloganon kon ubanan sa mga buhat sa kalooy, sama sa pagpaambit og pagkaon sa gigutom, paghatag og kasilongan sa mga kabos, ug paglihok para sa hustisya ug kaangayan (Is 58:6-7). Diha sa Ebanghelyo karon  gipasabot ni Kristo nga adunay saktong panahon alang sa pagpuasa. Ug para kanatong mga Katoliko, ang Kwaresma maoy labing sakto nga kahigayonan sa paghimo niini. Makighiusa kita ni Kristo diha sa Iyang paghigugma, pagpangalagad ug pagsakripisyo alang sa kinabuhi ug kahamugaway sa mga kabos ug sinalikway. Matod pa ni St. Peter Chrysologus, “Fasting is the soul of prayer, mercy is the lifeblood of fasting. So if you pray, fast ; if you fast, show mercy ; if you want your petition to be heard, hear the petition of others. If you do not close your ear to others, you open God’s ear to yourself.”

pohsiBtebAyU