Mateo 4:1-11

 Ang Santos nga Ebanghelyo sumala na San Mateo 4:1-11 (Sun. Feb. 26, 2023)

Unya gidala si Jesus sa Espiritu Santo ngadto sa dapit nga awaaw aron tintalon sa yawa. Didto nagpuasa si Jesus sulod sa 40 ka adlaw ug 40 ka gabii ug unya gigutom Siya. Ug miduol kaniya ang yawa nga nag-ingon, “Anak Ka man kaha sa Dios, himoang pan kining mga bato.” Mitubag si Jesus, “Ang Kasulatan nag-ingon, ‘Ang tawo mabuhi dili sa pan lamang, kondili sa matag Pulong usab nga isulti sa Dios.’ ” Unya gidala si Jesus sa yawa ngadto sa Jerusalem, ang Balaang Siyudad, ug gipatindog Siya sa kinatas-ang bahin sa Templo ug giingnan, “Anak Ka man kaha sa Dios, ambak ngadto sa ubos kay nag-ingon man ang Kasulatan : ‘Ang Dios magsugo sa Iyang mga anghel pagbantay Kanimo ; sapnayon Ka nila aron dili maigo sa bato bisan gani ang Imong tiil.’ ”Si Jesus mitubag, “Apan nag-ingon usab ang Kasulatan, ‘Ayaw tintala ang Ginoo nga imong Dios.’ ” Unya gidala si Jesus sa yawa ngadto sa usa ka habog kaayong bukid ug gipakita Kaniya ang tanang gingharian sa kalibotan ug ang ilang kaanindot. Ang yawa miingon, “Ihatag ko Kanimo kining tanan kon moluhod Ka ug mosimba kanako.” Mitubag si Jesus, “Pahawa, satanas ! Ang Kasulatan nag-ingon, ‘Simbaha ang Ginoo nga imong Dios ug Siya lamang ang alagari !’ ” Busa ang yawa mibiya Kaniya ug unya nangabot ang mga anghel ug miatiman Kaniya.

Pamalandong : 

UNSAY MAAYONG BUHATON SULOD NIINING KWARESMA ?

Si Tibo miingon sa iyang mga anak : "Sulod niining kwaresma, dili na kita mokaon og karne sa matag Biernes. Mao kini ang gisulti ni Padre sa misa." Apan usa ka Biernes niana, nakita sa kamanghurang anak nga nag-ablig delatang beef loaf ang ilang tatay. Iya kining gibadlong : "Tay, ingon ka dili na ta mokaon og karne matag Biernes, nganong nag-abli  ka man lagi og beef loaf ?" "Dili man kini karne," dayong tubag ni Tibo. "Unsay dili ? Tay, gitawag na og beef loaf kay duna na siyay sagol nga karneng baka," mipasabut ang mga bata. Unya nangisog si Tibo sa pag-ingon : "Oi, oi, ayaw ko ninyo ilara mga anak. Kay ngano, nagtoo ba mo nga kanang hotdog adunay sagol nga iro ?"

Niadtong milabay nga Mierkoles nagsugod ang panahon sa kwaresma. Gihimo nato ang pagpamadlis og abo sa agtang agig pagpakita sa pagdawat nato sa atong pagkatawhanon ug sa atong determinasyon nga maghinulsol sa atong mga kasal-anan. Nasayud kita nga  tawo lamang kita , huyang ug dali rang madani sa kadaotan. Apan, nagpabilin kitang masaligon ug inubanan sa panabang sa Dios, mabuntog nato ang gahum sa yawa ug mabiyaan ang sala.

Ang labing dakong tumong sa kwaresma mao ang paghimog spiritwal nga pagpangandam alang sa kasaulogan sa paghalad ni Kristo sa iIyang kinabuhi ug sa Iyang madaugong pagkabanhaw. Ang mga pagbasa niadtong Mierkoles sa Badlis nagpahinumdum kanato sa mga naandang gimbuhaton sa panahon sa kwaresma : matinud-anong pag-ampo, pagpuasa o pagsakripisyo, ug pagtabang sa mga kabos. Kining tulo maoy giisip nga labing lig-on nga pangkontra sa tentasyon sa yawa.

Motoo ba kamo nga adunay yawa ? Ang pulong nga “satanas” (satan'el in Hebrew) o “diyablo” (diabolos in Greek) nagpasabut og kaaway. Si satanas mao ang kaaway nga magdala sa tawo ngadto sa kaalaotan. Ang Ebanghelyo nagsaysay kanato nga si Kristo gitental ni satanas didto sa kamingawan sulod sa kwarenta ka adlaw. Apan nagpabilin Siya nga malig-on ug wala gayod madani sa mga hulhog sa dautang linalang. Bisan tuod ug dili nato makita si satanas, atong mabati nga siya nagalihok gayud aron kita mapalayo sa Ginoo. Sugod sa sayong kabuntagon hangtud sa lawom nga kagabhion, kapila man nato masinati ang lihok ug tentasyon sa yawa ? Nadungog mo ba siya sa dihang siya miingon: “Duol ngadto sa imong mga silingan nga nagtapok kay nindot ang tsismis didto.” “Daota ang imong isigka-trabahante aron madaot ang iyang pangalan ug ikaw nay ipuli sa iyang taas nga posisyon.” “Unaha ang imong kaugalingon kay basin maalkanse ka.” “Pagkodigo aron modako ang imong grado.” “Panikas sa negosyo aron madato ka.” “Pangabit aron ilhon ka nga tinuod nga lalaki.” “Gawas lang og una sa opisina. Dili bitaw ka mahinungan.” “Inum og daghan samtang nia pa ka sa kalibutan. Sa langit wala nay beer.” “Ayaw kahadlok mangawat sa kwarta sa gobyerno kay daghan man mong naghimo niana.” “Palit og mahalon nga butang aron daygon ka sa mga tawo.” “Unya na lang pagtarong sa imong kinabuhi kon matigulang naka. Pasayloon lagi ka sa Dios.” Ang mga pulong sa yawa nindot apan makadaot.

“Ayaw lang gyud patental.” Nasayod kita nga sayon lang ni isulti, apan lisud buhaton. Ang yawa makamao mogamit og panagway nga maanyag, lawas nga makadani, ug mga butang nga makasilaw. Ug basi sa atong kasinatian, dili sayon ang pagbalibad sa tentasyon ni satanas. Apan, ang maayong balita sa Ebanghelyo para kanato karon mao kini : Si Kristo nagmadaogon batok sa mga tentasyon sa yawa. Walay nahimo Kaniya si satanas ! Tungod niini, kita nahatagag dakong kadasig ug kaisog. Inubanan ni Kristo, aduna kitay katakos nga magdumili sa tentasyon sa yawa ug magmadaogon batok sa gahum ni satanas.

Niining panahon sa kwaresma, moduol kita sa Sakramento sa Kumpisal ug ihalad nato ang atong mga sala ngadto ni Kristo. Uban sa pasaylo sa Ginoo, madawat usab nato ang dugang grasya ug kusog nga mao unyay atong gamiton sa pagpakigbatok sa yawa. Matod pa ni San Agustin, " God has promised forgiveness to your repentance, but He has not promised tomorrow to your procrastination.

pohsiBtebAyU