Marcos 9:2-13

 Ang Santos nga Ebanghelyo sumala ni San Marcos 9:2-13 (Sat. Feb. 18, 2023)

Tapos sa unom ka adlaw gidala ni Jesus sila si Pedro, si Santiago ug si Juan ngadto sa usa ka taas nga bukid diin didto walay laing tawo gawas kanila. Ug samtang nagtan-aw sila kang Jesus nausab ang Iyang panagway. Ang Iyang bisti misanag sa hilabihang kaputi nga walay bisan kinsa sa tibuok kalibotan nga makapaputi sama niini. Unya nakita sa tulo ka tinun-an si Elias ug si Moises nga nakigsulti kang Jesus. Ug miingon si Pedro kang Jesus, “Magtutudlo, maayo nga ania kita dinhi. Maghimo kami ug tulo ka payagpayag, usa alang kanimo, usa alang kang Moises ug usa alang kang Elias.” Nakaingon siya niini kay wala siya mahibalo kon unsay iyang isulti kay nangalisang man sila. Unya dihay panganod nga mitungha ug gilandongan sila niini. Ug may nadungog silang tingog gikan sa panganod nga nag-ingon, “Kini Siya mao ang pinangga kong Anak. Pamati kamo Kaniya !” Gitan-aw dayon sa mga tinun-an ang palibot apan wala na silay nakitang tawo gawas lamang kang Jesus. Sa nanglugsong na sila sa bukid gidid-an sila ni Jesus sa pagpanugilon kang bisan kinsa sa ilang nakita hangtod nga ang Anak sa Tawo mabanhaw na. Gituman nila ang Iyang sugo apan nalibog sila kon unsa ang kahulogan sa giingon Niyang pagkabanhaw. Ug ilang gipangutana si Jesus, “Nganong nag-ingon man ang mga magtutudlo sa Balaod nga kinahanglang mouna gayod pag-anhi si Elias ?” Siya mitubag, “Tinuod gayod nga si Elias mouna pag-anhi aron pag-andam sa tanang butang. Apan nganong nag-ingon man ang Kasulatan nga ang Anak sa Tawo mag-antos pag-ayo ug isalikway ? Hinuon, sultihan Ko kamo nga si Elias miabot na ug gibuhat sa mga tawo kaniya ang tanan nga buot nilang buhaton sumala gayod sa giingon sa Kasulatan.”

Pamalandong :

UNSA MAY HAGIT SA MAHIMAYAONG PAGKAUSAB SA PANAGWAY SA GINOO ? 

Sayran nato nga kining misteryo sa kinabuhi ni Jesus nahitabo samtang Siya nagpadulong sa Jerusalem aron pagtuman sa panagna sa mga propeta pinaagi sa Iyang kamatayon sa krus. Gidala ni Jesus si Pedro, Santiago ug Juan sa taas nga bukid aron ipadayag kanila'g una ang himaya sa Dios ug aron usab sila mahatagan og kaisog sa pag-atubang sa mga kasakit nga modangat kanila didto sa Jerusalem. Ang hagit sa mga apostoles, ug kanatong tanan karon, mao ang pagpaminaw ug pagsunod kang Kristo pinaagi sa pagsakripisyo sa atong kaugalingon alang sa kaayohan sa uban, agi’g pagsunod sa kabubut-on sa Dios Amahan. Si Pope Francis nag-ingon : “The way of Jesus always leads us to happiness. There will always be a cross in the middle, but at the end he leads us to happiness.”

pohsiBtebAyU