Marcos 8:22-26

 Ang Santos nga Ebanghelyo sumala ni San Marcos 8:22-26 (Wed. Feb. 15, 2023)

Pag-abot nila sa Betsaida dihay usa ka buta nga gidala sa pipila ka tawo ngadto kang Jesus ug gihangyo nila si Jesus sa paghikap kaniya. Gigunitan ni Jesus ang kamot sa buta ug gidala Niya siya ngadto sa gawas sa balangay. Gituthuan ni Jesus ang mga mata sa tawo ug gihikap kini, unya gipangutana Niya, “May nakita ka ba ?” Mihangad ang tawo ug miingon, “Oo, nakakita akog mga tawo apan mura silag mga kahoy nga naglakawlakaw.” Unya gihikap ni Jesus pag-usab ang mga mata sa tawo. Niining higayona mitutok ang tawo ug nahibalik ang iyang maayong panan-aw. Unya gipapauli siya ni Jesus ug gipahimangnoan nga dili una mobalik sa balangay.

Pamalandong :

UNSA MAN ANG DIOSNONG PAAGI SA PAGLUWAS OG TAWO ? 

Gihawiran ni Jesus ang kamot sa buta ug Iya kining gidala ngadto sa gawas sa balangay. Dili lang kausa kondili kaduha Niya gitapion ang Iyang mga kamut sa mga mata niini. Human ayoha, gipinahan ni Jesus ang buta sa dili pagbalik sa balangay. Kining Ebanghelyo karon maoy usa ka nindot nga hulagway sa proseso sa Diosnong paagi sa pagluwas og tawo. Mahitabo kini dili sa usa ka pagpamilok lamang kondili sa hinayhinay nga paagi. Dapiton ang tawo sa pagbiya sa iyang daang kahimtang ug pagsugod og lakaw uban sa Ginoo. Dili kini sayon ug angay ubanan og igong pasensya ug dakong gugma. Ang pagpakaulaw ug pag-insulto'g tawo dili buhat nga Diosnon. Adunay nag-ingon, “When you are tempted to lose patience with someone, think how patient God is with you all the time.”

pohsiBtebAyU