Marcos 8:14-21

 Ang Santos nga Ebanghelyo sumala ni San Marcos 8:14-21 (Tue. Feb. 14, 2023)

Ang mga tinun-an nakalimot sa pagdalag daghang pan. Usa ra ka buok pan ang ilang nadala didto sa sakayan. Unya miingon si Jesus kanila, “Pagbantay kamo sa igpapatubo sa pan sa mga Pariseo ug ni Herodes.” Ug nag-ingnanay sila, “Gisulti Niya kini kay wala man kitay pan.” Nahibalo si Jesus sa ilang gipanagsultihan busa gipangutana Niya sila, Nganong naglalis man kamo nga wala kamo makadala ug pan ? Wala ba gihapon kamo makasabot ? Bugo na ba gayod kamo kaayo ? May mga mata man unta kamo apan nganong dili man kamo makakita ? May mga dalunggan man unta kamo apan nganong dili man kamo makadungog ? Wala ba kamo mahinumdom sa Akong pagpikaspikas sa lima ka pan alang sa 5,000 ka tawo ? Pila ba ka bukag ang napuno sa mga salin nga inyong nahipos ?” “Napulog-duha,” mitubag sila. “Ug sa akong pagpikaspikas sa pito ka pan alang sa 4,000 ka tawo, pila ba ka bukag ang napuno sa mga salin nga inyong nahipos ? “Pito,” mitubag sila. “Unya wala pa ba gihapon kamo makasabot ? ” Miingon Siya kanila.

Pamalandong :

BUGO NA BA GAYOD KAMO KAAYO ? 

Makusganon nga gisaway ni Jesus ang mga tinun-an tungod sa kahuyang sa ilang pagsalig Kaniya. Nasaksihan nila sa ilang kaugalingong mga mata ang milagro nga gihimo ni Jesus sa dihang Iyang gipadaghan ang pan ug isda. Apan, gibati gihapon sila'g kabalaka sa dihang usa na lang ka pan ang nahibilin kanila. Klaro kaayo nga wala gihapon sila makasabut. Isip mga sumusunod ni Cristo, kinahanglang maglakaw kita ning kalibotan – magtoon, magtrabaho, o magnegosyo – uban sa dakong pagsalig ug panabang sa Ginoo. Dili kita magsige'g kabalaka tungod kay kini dili makatabang kanato. Buhaton lang nato ang atong makaya ; Dios nay mag-igo sa dili nato mahimo.” sakto ang gisulti ni Thomas Aquinas nga, "Faith has to do with things that are not seen and hope with things that are not at hand.

pohsiBtebAyU