Marcos 7:24-30

 Ang Santos nga Ebanghelyo sumala ni San Marcos 7:24-30 (Thu. Feb. 9, 2023)

Unya mibiya si Jesus ug miadto sa kayutaan duol sa siyudad sa Tiro. Mipuyo Siya sa usa ka balay ug dili Siya buot nga may mahibalo niini apan wala gayod Siya makatago. Dihay usa ka inahan nga may anak nga babaye nga giyawaan. Sa pagkabalita niya mahitungod kang Jesus, miadto dayon siya Kaniya ug mihapa sa Iyang tiilan. Ang maong babaye usa ka langyaw nga didto matawo sa Fenicia, sa Siria. Gihangyo niya si Jesus sa paghingilin sa yawa gikan sa iyang anak. Apan si Jesus mitubag, “Kinahanglan nga unahon pagpakaon ang mga anak. Dili maayo nga kuhaon ang pagkaon sa mga anak ug ipakaon sa mga iro.” Mitubag ang babaye, “Apan, Sir, bisan gani ang mga iro diha ilalom sa lamisa makakaon man sa mumho sa kabataan.” Ug miingon si Jesus kaniya, “Tungod sa imong gisulti makapauli ka na. Ang yawa migula na gikan sa imong anak !”Busa mipauli ang babaye sa ila ug iyang nakita ang iyang anak nga naghigda ; wala na diha kaniya ang yawa.

Pamalandong :

NGANONG KINAHANGLAN MAN NATONG RESPETOHAN ANG MGA TAWO NGA LAHI NATOG PAGTOO ? 

Para sa mga Hudiyo, ang mga pagano o mga tawo nga lahi kanila'g pagtoo sama ra og bili sa iro. Kining maong panghunahuna gipamulong ni Kristo ngadto sa babaye nga pagano nga mihangyo Kaniya alang sa kaayohan sa iyang anak nga masakiton. “Dili maayo nga kuhaon ang pagkaon sa mga anak ug ipakaon sa mga iro.” Gisulti kini ni Jesus dili aron pag-insulto sa maong babaye kondili aron pagsukod sa iyang pagtoo. Ug sa dihang napamatud-an ni Jesus ang kahugot sa pagtoo sa babaye, Iyang gihatag ang iyang gipangayo. Kining Ebanghelyo karon magtudlo kanato sa pagtahud sa matag tawo, bisan unsa pa'y  iyang pagtoo nga gihuptan. Matod pa, “We don’t have to agree on anything to be kind to one another.”

pohsiBtebAyU