Marcos 6:53-56

 Ang Santos nga Ebanghelyo sumala ni San Marcos 6:53-56 (Mon. Feb. 6, 2023)

Mitabok sila sa lanaw ug midunggo sa Genesaret ug gihigot nila ang sakayan. Sa pagkawas na nila nailhan dayon si Jesus sa mga tawo. Busa nanagan sila ngadto sa kasilinganan. Bisan asa nila madunggan nga atua si Jesus dad-on nila ngadto Kaniya ang ilang mga masakiton nga naghigda sa ilang mga higdaanan. Bisan asa si Jesus moadto, sa kabalangayan ba, sa kalungsoran o sa kaumahan, adto gayod sa merkado dad-on sa mga tawo ang ilang mga masakiton. Nagpakiluoy sila nga ang ilang masakiton pahikapon bisan lamang sa sidsid sa Iyang bisti. Ug nangaayo ang tanan nga nakahikap Kaniya.

Pamalandong :

NGANONG ANGAY MAN NATONG ALAGARAN ANG MGA MASAKITON ? 

Una sa tanan, ang mga masakiton adunay dakong luna sa kasingkasing sa Ginoo. Ang Ebanghelyo karon nagsaysay nga bisan asa si Jesus moadto, dad-on sa mga tawo ang ilang mga masakiton aron Iyang ayohon. Gihatagan ni Jesus og panahon ang mga masakiton, gitugotan sila nga mohikap Kaniya ug nangaayo sila. Sa laing higayon, si Jesus mismo ang nihilam sa mga masakiton ug giayo sila Niya. Dugang pa niini, ang pag-atiman sa masakiton klaro nga gisugo ni Kristo sa Iyang mga tinun-an: “Lakaw, ug isangyaw ninyo ang Maayong Balita : ang paghari sa Dios haduol na. Ayoha ninyo ang mga masakiton.” Ang atong pagtuman ning maong kasugoan maghatag kanato og luna sa Gingharian sa Ginoo tungod kay matod pa Niya, “Nasakit Ako ug inyo Akong giduaw.” Matod pa sa usa ka sinultihon, " If you want happiness for an hour, take a nap. If you want happiness for a day, go fishing. If you want happiness for a year, inherit a fortune. If you want happiness for a lifetime, help somebody.”

pohsiBtebAyU