Lukas 5:27-32

 Ang Santos nga Ebanghelyo sumala ni San Lukas 5:27-32 (Sat. Feb. 25, 2023)

Human niini, milakaw si Jesus ug Iyang nakita si Levi, usa ka maniningil sa buhis, nga naglingkod sa iyang opisina. Miingon si Jesus kaniya, “Sunod Kanako.” Ug mitindog si Levi, gibiyaan niya ang tanan ug misunod Kaniya. Unya si Levi naghimo'g dakong kombira sa iyang balay alang kang Jesus ug didtoy daghang maniningil sa buhis ug ubang mga tawo nga nakigsalo kanila. Ang pipila ka mga Pariseo ug mga magtutudlo sa Balaod nagbagulbol batok sa mga tinun-an ni Jesus. Nangutana sila, “Nganong nakig-uban man kamo sa pagkaon ug pag-inom sa mga maniningil sa buhis ug sa mga makasasala ?” Si Jesus mitubag kanila, “Ang mga tawo nga walay sakit wala magkinahangla'g doktor kondili ang mga masakiton lamang. Wala Ako moanhi aron sa pagtawag sa mga matarong kondili sa mga makasasala aron maghinulsol sila.”

Pamalandong :

KINSA MAN ANG MAS BULAHAN, ANG MAKASASALA BA O ANG MATARONG ? 

Sa pag-ingon ni Kristo, “Gitawag Ko ang mga makasasala, dili ang mga matarong,” wala kini magpasabot nga mas pinangga Niya ang mga masalaypon kaysa mga buotan. Ang mga matarong gimahal pag-ayo sa Dios. Apan, gusto usab Niyang luwason ang mga makasasala. Sila ang nanginahangla'g doktor ug sila ang hinungdan sa pag-anhi ni Kristo. Ang mga makasasala nga modawat sa ilang sayop ug mobiya sa daotang kinabuhi aron pagsunod kang Kristo maoy makaangkon og kaluwasan. Mao kini ang nahitabo kang Levi, Zakeo, Maria Magdalena, ug sa uban pa. Apan ang mga tawong nagtoo nga sila walay sala, sama sa mga Pariseo, mao na hinoon ang dili maluwas. Sakto ang panultihon, “A humble sinner is better than a self-righteous saint”.

pohsiBtebAyU