Marcos 4:26-34

 Ang Santos nga Ebanghelyo sumala ni San Marcos 4:26-34 (Fri. Jan. 28, 2023)

Unya mipadayon si Jesus pagsulti, “Ang paghari sa Dios sama niini : May tawo nga nagsabod ug binhi sa iyang uma. Adlaw-adlaw nagpadayon siya sa iyang buluhaton. Miturok ug mitubo ang mga binhi sa paagi nga wala niya hisabti. Ang yuta, pinaagi sa kinaiya niini, nagpatubo ug nagpabunga sa mga tanom : maoy mouna ang linghod nga punoan, unya mosunod ang iyang uhay ug unya ang bus-ok nga mga lugas. Ug inigkahinog na, galabon kini kay ting-ani na man.” Unya nangutana si Jesus, “Sa unsa mang butanga ikatandi nato ang paghari sa Dios ? Ug unsa mang sambingaya ang gamiton nato pagsaysay niini ? Sama kini sa liso sa mustasa nga maoy labing gamay nga liso dinhi sa kalibotan. Kon itanom kini ug makatubo na, mahimo kining labing dako sa tanang tanom. Managko ang iyang mga sanga ug dinhi magpasilong ug magsalag ang mga langgam.” Nagwali si Jesus ngadto sa mga tawo ginamit ang daghan pang mga sambingay nga sama niini. Wala Siyay gisulti kanila nga wala ipaagi sa mga sambingay. Apan kon ang Iyang mga tinun-an na lamang ang kauban Niya, Iyang ipatin-aw kanila ang tanan.

Pamalandong :

UNSA MAY ATONG MAKAT-ONAN SA SAMBINGAY SA LISO SA MUSTASA ? 

Ang liso dili motubo sa usa ka pagpamilok lamang ug ang tanum makapamunga human sa igong panahon. Ang mga Hudiyo nagpaabot og Mesiyas nga dihadiha mopabarog sa Gingharian sa Dios. Apan, niabot si Jesus kanila sama sa usa ka bata, nitubo sulod sa dugay'ng panahon, ug nagsangyaw sulod sa katuigan. Dili ba kita susama usab sa mga Hudiyo ? Gusto kita nga mausab ang hulagway sa katilingban sa dinali-ang paagi, o kaha nga mabag-o ang usa ka tawo sa usa ka pamilok lamang. Apan dili ingon niini ang pamaagi sa Dios. Bililhon para Kaniya ang atong proseso sa pagtubo, ang atong pasensya ug mga paningkamot. Adunay nag-ingon : “Do not expect miracles to happen overnight. Be patient, be loving. And little by little the change you seek will come.”

pohsiBtebAyU