Marcos 3:7-12

 Ang Santos nga Ebanghelyo sumala ni San Marcos 3:7-12 (Thu. Jan. 19, 2023)

Si Jesus ug ang Iyang mga tinun-an nangadto sa Lanaw sa Galilea ug gisunod Siya sa usa ka dakong panon sa mga tawo. Kining mga tawhana gikan sa Galilea, sa Judea, sa Jerusalem, sa mga dapit nga sakop sa Edomea ingon man sa tabok sa Jordan ug sa kasikbit nga mga dapit sa siyudad sa Tiro ug sa Sidon. Nangadto sila kang Jesus kay nakadungog man sila sa mga butang nga Iyang gibuhat. Gisugo ni Jesus ang Iyang mga tinun-an sa pag-andam ug sakayan alang Kaniya kay basin unyag mapiit Siya sa daghan kaayong mga tawo. Daghang mga tawo ang Iyang giayo ug tungod niana ang tanan nga may balatian nag-ilogay pagduol aron makahikap Kaniya. Sa dihang nakita si Jesus sa mga tawong giyawaan, nanghapa sila sa Iyang atubangan ug naninggit, “Ikaw mao ang Anak sa Dios !” Apan higpit nga gipahimangnoan sila ni Jesus nga dili nila ipanugilon kon kinsa Siya.

Pamalandong :

UNSA MAY KATUYOAN SA ATONG MAAYONG BINUHATAN ? 

Ang mga maayong butang nga gipanghimo ni Jesus nadunggan sa daghang mga dapit ug ang katawhan nagsunodsunod Kaniya. Nagpaandam na Siya’g sakayan nga masakyan aron dili Siya ma-ipit sa kadaghan sa mga tawo. Bisan ang mga yawa nanghapa sa Iyang atubangan ug niila Kaniya. Apan, sa kaulahi-an, ang Ebanghelyo nag-ingon, “Gipahimangnoan pag-ayo ni Jesus ang mga yawa nga dili manugilon kon kinsa Siya.” Ang katuyoan sa mga buhat ni Kristo mao ang kaayohan sa katawhan, dili ang kadungganan sa Iyang ngalan. Si San Agustin nagtudlo ning maong hiyas : “Humility must accompany all our actions, must be with us everywhere ; for as soon as we glory in our good works they are of no further value to our advancement in virtue.”

pohsiBtebAyU