Mateo 3:1-12

 Ang Santos nga Ebanghelyo sumala ni San Mateo 3:1-12 (Sun. Dec. 4, 2022 Ikaduhang Domingo Sa Adbiyento)

Niadtong panahona miadto si Juan nga Magbubunyag didto sa dapit nga awaaw sa Judea ug nagwali nga nag-ingon, “Hinulsoli ug biyai ang inyong mga sala kay hapit na maghari ang Dios.” Si Juan mao ang gihisgotan ni propeta Isaias sa iyang pag-ingon, “May nagsinggit didto sa kamingawan : ‘Andama ninyo ang dalan alang sa Ginoo, himoang tul-id ang Iyang agianan !’  Ang bisti ni Juan hinimo gikan sa balhibo sa kamelyo ug nagbakos siya'g panit ug ang iyang kan-onon dulon ug dugos. Unya nangadto kaniya ang mga tawo gikan sa Jerusalem ug tibuok lalawigan sa Judea ug gikan sa kayutaan nga kasikbit sa Suba sa Jordan. Gisugid nila ang ilang mga sala ug gibunyagan niya sila didto sa Suba sa Jordan. Sa pagkakita ni Juan nga may daghang Pariseo ug Saduseo nga nanuol kaniya aron magpabunyag, giingnan niya sila, “Mga bitin ! Kinsay nagsulti kaninyo nga makalikay kamo sa taliabot nga paghukom sa Dios ? Ipakita ninyo nga naghinulsol na kamo sa inyong mga sala pinaagi sa inyong buhat. Nagdahom ba kamo nga kay kaliwat kamo ni Abraham maluwas kamo ? Sultihan ko kamo : makahimo ang Dios pagkuha niining mga bato aron himoong mga anak ni Abraham ! Gani giandam na sa Dios ang atsa aron iputol sa mga kahoy diha sa mga gamot. Ang tanang kahoy nga dili mamunga'g maayong bunga putlon ug isugnod sa kalayo. Ako nagbunyag kaninyo pinaagi sa tubig aron pagpakita nga naghinulsol ug mibiya kamo sa inyong mga sala. Apan ang moanhi sunod kanako magbunyag kaninyo pinaagi sa Espiritu Santo ug sa kalayo. Siya mas gamhanan kay kanako ug dili ako angay bisan gani sa pagbitbit sa Iyang sandalyas. Naggiok Siya ug nagpalid aron lainon ang uhot gikan sa mga lugas. Tigumon Niya ang mga lugas didto sa kamalig apan ang mga uhot Iyang sunogon sa kalayo nga dili mapalong !”

Pamalandong :

“PAGHINULSOL, BIYAI NINYO  ANG PAGPAKASALA, TUNGOD KAY ANG PAGHARI SA DIOS HADUOL NA !”

Ning ikaduhang Domingo sa Adbiyento, ang Simbahan nag-awhag kanato nga mangandam sa atong kaugalingon alang sa nagkaduol nga pag-abot sa Ginoo sa atong kinabuhi. Ang mensahe ni Juan nga Magbubunyag maoy atong hatagan og seryosong pagtagad : 

“Andama ang dalan sa Ginoo. Tul-ira ang Iyang mga agi-anan !”

Unsaon man nato pagtubag kining maong hagit ? Ang atong tubag magsugod pinaagi sa pagpangutana sa atong kaugalingon : Unsa mang bahina sa atong kinabuhi ang kinahanglan natong tul-iron ? 

- Ang ato bang relasyon uban sa Dios ? Wala ba nato hatagi'g lugar o panahon ang Dios diha sa atong kinabuhi ? Nagkulang ba kita sa pag-ampo ug pagpaminaw sa Iyang mga Pulong ? Wala ba kita magsunod sa Iyang kabubut-on ug mga kasugoan ?

- Ang ato bang kinabuhi uban sa pamilya ? Napakyas ba kita sa pagtuman sa atong obligasyon isip bana, asawa, ginikanan, anak, o igsoon ? Nagkulang ba kita sa paghigugma ug pag-amoma ? Aduna bay sakop sa atong pamilya nga wala nato mahatagi og saktong pagtagad ? Aduna pa bay kapamilya nga wala nato madawat ug mapasaylo ? Ang ato bang kinabuhi diha sa mas dakong komunidad ? Wala ba kita magtuman sa atong obligasyon sa gobyerno ug sa Simbahan ? Nakabuhat ba kitag dili maayo sa isigkatawo ? Nagmapahitas-on ba kita ug nangyatak sa katungod sa uban ? Namintaha ba kita ug nanikas ? Wala ba kita magpakabana sa mga kabos ug ubos tang kaigsoonan ? Nagpakita ba kita og daotang ehemplo ngadto sa isigkatawo ?

- Ang ato bang relasyon uban sa kinaiyahan ? Giabusohan ug giguba ba nato ang nindot nga kabuhatan sa Dios – ang kapaligiran, kabukiran, kadagatan ug kahanginan. Apil ba kita sa mga naghugawhugaw ug nagpatakag labay og mga basura ? Wala ba kita maghunahuna sa pagpananum og mga kahoy ? 

-O, basin aduna kitay angay nga tul-iron sa ato mismo nga kaugalingon ? Wala ba nato magamit sa maayong paagi ang mga gasa ug mga talento nga hinatag sa Ginoo ? Giabusaran ba nato ang atong lawas pinaagi sa daotang mga bisyo ug kawalay ehersisyo ? Napasagdan ba nato ang atong kalag tungod sa mga kalibotanong mga butang ug kalingawan ?

Mao kini ang gitawag og “self-check” o “examination of conscience” – usa ka malangkubong pagtan-aw sa atong kinabuhi, nga angay natong himoon niining panahon sa Adbiyento aron atong makita og unsa ang angay natong tul-iron sa atong kinabuhi. Dili kita makahimo og tinuod nga pagbag-o o conversion kon kita walay igo nga pag-ila sa atong kaugalingon.

Si San Juan Magbubunyag mao ang tingog nga nagagikan sa disyerto. Nasabtan niya ang kahulogan sa iyang kinabuhi ug ang kabubut-on sa Dios tungod sa iyang pagpuyo sa kamingawan. Ang disyerto, para kanato karon, mao ang lugar ug panahon diin ug kanus-a wala ang mga disturbo. Ang disyerto mao ang lugar sa pag-ampo, ang panahon sa kahilom ug pagpamalandong, nga atong igahin ning panahon sa Adbiyento. Ang disyerto usa ka makahulagong pulong sa Ebanghelyo nga nagrepresentar sa punto kanus-a atong atubangon ang tinuod tang kaugalingon – ang atong kusog ug kahuyang, ang atong kaayo'g kadaotan, ang atong kadaogan ug kapakyasan. Human nato makita ug masabtan ang atong kaugalingon, atong tubagon ang hagit ni San Juan Magbubunyag – ang pagtul-id sa dalan nga agi-an sa Ginoo padulong sa atong kasingkasing. Kini nagpasabot og pagtarong sa atong kinabuhi, pagpahimutang sa atong mga relasyon, ug pagpasulod sa Ginoo diha sa atong kasingkasing.

pohsiBtebAyU