Mateo 11:2-11

 Ang Santos nga Ebanghelyo sumala ni San Mateo 11:2-11 (Sun. Dec. 11, 2022 Ikatulong Domingo Sa Adbiyento)

Sa pagkadungog ni Juan nga Magbubunyag nga didto sa bilanggoan mahitungod sa gihimo ni Cristo, gipaadto niya ang pipila sa iyang mga tinun-an ngadto kang Jesus. Ug nangutana sila Kaniya, “Sultihi kami, Ikaw ba ang giingon ni Juan nga moanhi o magpaabot pa ba kamig lain ?” Si Jesus mitubag, “Pamauli kamo ug suginli si Juan sa inyong nadungog ug nakita : ang mga buta nakakita, ang mga bakol nakalakaw, ang mga sanlahon nangaayo, ang mga bungol nakadungog, ang mga minatay nangabanhaw ug ang Maayong Balita gisangyaw ngadto sa mga kabos. Bulahan kadtong wala magduhaduha Kanako !” Samtang namauli ang mga tinun-an ni Juan, si Jesus miingon sa mga tawo mahitungod kang Juan, “Sa pag-adto ninyo kang Juan didto sa dapit nga awaaw, unsay gipaabot ninyong makita ? Sagbot ba nga gipilaypilay sa hangin ? Dili. Unsa ba gyod ang inyong giadto aron tan-awon ? Tawo ba nga nindot kaayog pamisti ? Dili usab kay ang mga tawo nga nagbistig sama niini atua man magpuyo sa mga palasyo. Sultihi Ako unsa man gyod ang gipaabot ninyong makita ? Propeta ba ? Oo, propeta, apan ang nakita ninyo labaw pa sa usa ka propeta. Si Juan mao ang giingon sa kasulatan : ‘Ania ang akong sinugo, nag-ingon ang Dios, ipadala Ko siya una Kanimo aron andamon niya ang dalan alang Kanimo.’ Hinumdomi kini : Wala pay tawo nga milabaw kang Juan nga Magbubunyag. Apan bisan kadtong labing ubos sa mga nagpailalom sa paghari sa Dios labaw pa kay kaniya.

Pamalandong :

SA UNSANG PAAGIHA KITA MAKATABANG SA PAGPADAYAG SA GUGMA UG KALOOY SA DIYOS DIHA SA KATILINGBAN ? 

Karon mao ang ikatulong Domingo sa Adbiyento, nga gitawag og “Gaudete Sunday”. Ang “Gaudete” usa ka pulong nga Latin nga nagpasabot, “Rejoice” o “Paglipay.” Gikuha kini sa unang pulong sa Entrance Antiphon para sa Misa ning adlawa : “Paglipay tungod kay nagkaduol na ang Ginoo !” Ang Simbahan buot modasig sa katawhan tungod kay taliabot na ang Manluluwas ! Ang ikaduhang pagbasa gikan sa Sulat ni Santiago nag-ingon : “Pailob kamo, mga igsoon. Tan-awa unsa ang pagpailob sa mag-uuma samtang siya nagpaabot sa pag-ani.” 

Angay kitang magmadasigon, dili mawad-an og paglaum, tungod kay aduna kitay gipaabut nga himaya ug kadaogan. Dili kita angay’ng mahadlok tungod kay ang Ginoo moabut aron sa pagluwas kanato, dili aron pagsilot kanato. Angay usab kitang magmapailobon, dili mag-apura ug dili magdali-dali kay gipahiluna sa Dios ang tanang panahon. Ang Ginoo maoy nakahibalo kon unsa ang saktong panahon para sa atong kaluwasan.

Dili sayon ang magpaabot ug magpailob, ilabina kon anaa kita sa malisud ug mapa-it nga kahimtang. Mao kini ang gibati ni Juan nga Magbubunyag diha sa Ebanghelyo. Si Juan gipapriso ni Herodes tungod sa iyang pagsaway sa pagpakigminyo sa hari kang Herodias, nga asawa sa iyang buhing igsoon. Didto sulod sa bilanggoan, si Juan nibatig kahingawa. Nagsangyaw siya mahitungod sa nagsingabot nga paghari sa Dios ug iya nang gipaila si Jesus ngadto sa katawhan. Apan wala pa niya nabati nga aduna nay dagkong kausaban sa kalibutan. Nagpadayon pa man ang paghari sa kampo sa daotan. Gani, ang mga inosente nga sama kaniya nagpabilin pa man sa bilanggoan. Dinhi, atong masabtan ang iyang pagsugo og mga tawo sa pagpangutana kang Jesus : “Ikaw na ba ang moabut nga Mesiyas o maghulat pa mi og lain ?”

Daghan kanato makasabot sa gibati ni Juan tungod kay usahay mobati man usab kitag kabalaka o pagduhaduha sa gugma sa Dios. Dili ba tinuod ? Nagsigi kitag pangayo sa Ginoo og kasulbaran sa atong problema, apan murag wala may tubag sa atong pag-ampo. Nagsigi kitag paabut nga maayo na ang atong sakit, pero murag wala may kahupayan ang atong gibati. Nag-ampo kita nga makakita'g maayong trabaho o panginabuhi-an, pero hangtud karon wala pa may nakit-an.  Nag-ampo ka nga mabag-o na ang imong bana o anak aron  mobiya na sa daotang bisyo, pero mura mag walay nakita nga kausaban. “Lord, molihok Ka ba para sa among kaluwasan, maghari Ka ba sa among kinabuhi, o maghulat pa mig lain nga motabang kanamo ?”

Wala ikasuko ni Jesus ang maong pangutana ni Juan. Hinoon, Iyang gitabangan si Juan nga makasabot ug makabaton og lig-ong pagtuo. Giingnan Niya ang mga disipulo ni Juan : “Pamauli mo ug suginli si Juan sa inyong nadungog ug nasaksihan : ang mga buta nakakita, ang bakol nakalakaw, ang sanlahon naayo, ang bungol nakadungog, ang patay nabanhaw, ug ang Maayong Balita nawali sa mga kabos.” Ang mga Hudiyo nagtuo nga ang paghari sa Dios paga-ubanan og mga timailhan sama sa pagkakita sa mga buta, pagkadungog sa mga bungol, paglakaw sa mga bakol ug pagtingog sa mga amang. Kini mga ilhanan sa Diosnong pagpakabana, kalooy ug gugma. Atong masiguro nga ang tubag ni Jesus nakahatag kang Juan og bag-ong paglaum ug kadasig sulod sa bilanggoan.

Usa sa nindot nga kinaiya sa mga Hudiyo mao ang ilang dakong pagtuo sa aktibo nga pagpanginlabut sa Ginoo sa ilang kinabuhi. Sila nagsalig nga ang Dios makigsangka batok sa mga kaaway ug manalipod kanila batok sa tanang katalagman. Ang konteksto sa unang pagbasa mao ang pagkabilanggo sa mga Israelita didto sa Babilonia, usa ka dapit nga halayo sa ilang yutang natawhan. Didto sa Babilonia nasinati sa mga Israelita ang tumang kalisud ug kamingaw sa kinabuhi. Apan, haloyo ning tanan, adunay tingog sa usa ka propeta nga naghatag kanila og paglaum. Ang propeta nag-agni sa mga Israelita nga magmaisogon ug dili magpawala sa paglaum tungod kay ang Dios moabut aron magdalag kagawasan alang kanila. Mamauli unya sila sa Jerusalem sa dakong kalipay ug pagmaya uban sa Dios nga ilang Manluluwas.

Mao kini ang hagit para kanato samtang nagkaduol na ang Pasko : Magpabilin kitang masaligon nga ang Dios moabut gayod ug maghari sa atong kinabuhi. Taliwala sa problema sa druga, extra-judicial killings, ug korupsyon sa lain-laing hut-ong sa katilingban, adunay kaluwasan nga moabut kanato pinaagi kang Kristo. Sama sa mga Hudiyo sa karaang panahon, mosalig kita nga ang Dios manginlabot gayod sa atong kinabuhi. Dili kita Niya pasagdan tungod kay Siya puno sa kalooy ug gugma. Mao kini ang tinuod nga hulagway sa pagtuo : To continue trusting in the goodness of the Lord despite seeming contrary evidences ! Aduna pay kalisod ug kapa-it, apan ang Dios diha kang Jesus moabut ug maghupay niini aron Iyang ikapadayag ang Iyang kalooy ug gugma para kanatong tanan.

pohsiBtebAyU