Lukas1:5-25

 Ang Santos nga Ebanghelyo sumala ni San Lukas 1:5-25 (Mon. Dec. 19, 2022)

Sa panahon nga si Herodes maoy hari sa Judea, may usa ka pari nga ginganlag Zacarias nga sakop sa kaparian sa hut-ong ni Abias. Ang iyang asawa mao si Elisabet nga sakop usab sa parianong banay ni Aaron. Silang duha nagkinabuhi nga matarong ug dalaygon sa atubangan sa Dios ug nagtuman gayod sa tanang sugo ug balaod sa Ginoo. Wala silay anak kay dili man makapanganak si Elisabet ug kay tigulang na man silang duha. Usa ka adlaw niana, turno kadto sa ilang hut-ong. Nagtuman si Zacarias sa iyang katungdanan sa pagkapari atubangan sa Dios sumala sa bahin sa pag-alagad nga iyang angkon adlaw-adlaw. Sumala sa batasan nga gisunod sa mga pari, nagripa sila ug napili siya nga maoy mosunog sa insenso didto sa halaran busa misulod siya sa Templo sa Ginoo. Samtang nag-ampo ang panon sa mga tawo didto sa gawas sa takna nga gisunog ang insenso, mipakita kaniya ang usa ka anghel sa Ginoo nga nagtindog sa tuong bahin sa halaran diin gisunog ang insenso. Sa pagkakita ni Zacarias sa anghel, nahingangha siya ug nahadlok. Apan giingnan siya sa anghel, “Ayawg kahadlok, Zacarias ! Gidungog sa Dios ang imong pag-ampo ug ang imong asawa nga si Elisabet magsabak ug usa ka batang lalaki. Nganli siyag Juan. Inigkahimugso niya, magmaya ka ug malipay ingon man ang uban kay mahimo siyang dako atubangan sa Ginoo. Dili gayod siya moinom ug bino o isog nga ilimnon. Gikan sa iyang pagkatawo, mapuno siya sa Espiritu Santo ug dad-on niya ang daghang mga tawo sa Israel balik ngadto sa Ginoo nga ilang Dios. Mag-una siya sa Ginoo inubanan sa espiritu ug gahom sama sa nabatonan ni propeta Elias. Himoon niya nga magkauli ang mga amahan ug mga anak. Ang mga masupilon iyang pabalikon sa matarong nga dalan ug andamon niya ang katawhan alang sa Ginoo.” Giingnan ni Zacarias ang anghel, “Unsaon man nako pagkahibalo nga tinuod ang imong giingon ? Tigulang na ako ug ang akong asawa.” Ang anghel mitubag, “ “Ako si Gabriel nga nagtindog atubangan sa Dios nga maoy nagpadala kanako aron pagsulti ug pagsugilon kanimo niining maayong balita. Apan wala ka motuo sa akong mensahe nga matuman gayod sa hustong panahon. Tungod niini, maamang ka ! Dili ka makasulti hangtod sa adlaw nga matuman ang akong gisulti kanimo.” Niining higayona, naghulat ang mga tawo kang Zacarias ug nahibulong sila  nganong nadugay siya sa sulod sa Templo. Sa paggula niya, dili na siya makasulti kanila busa nagtuo sila nga nakakita siyag panan-awon sa sulod sa Templo. Ug tungod kay dili man siya makalitok bisag usa ka pulong, misinyas na lamang siya kanila. Pagkatapos sa iyang turno sa pag-alagad sulod sa Templo, mipauli si Zacarias sa ila. Wala madugay, nagsabak ang iyang asawa nga si Elisabet ug wala mobiya sa balay sulod sa lima ka bulan. Miingon si Elisabet, “Ang Ginoo mitabang gayod kanako ! Ug karon gikuha niya ang naghatag kanakog kaulawan atubangan sa mga tawo !”

Pamalandong :

MATARONG BA NGA SULAYON NATO ANG GAHUM SA DIOS ? 

Si Zacarias nagsimba sa Dios ug nagtuman sa Iyang mga kasugoan. Apan sa dihang gipahibalo siya ni anghel Gabriel nga gidungog ang iyang pag-ampo nga makaanak kang Isabel, nagduhaduha siya sa pagtoo. "Unsaon man nako pagkasayod nga mahitabo kini ? Tigulang na ako ug ang akong asawa edaran na pag-ayo." Nga sa ato pa, dili siya motuo kutob wala siyay makita. Tungod sa iyang pagsukod sa gahum sa Dios, si Zacarias gikuhaan og katakos sa pagsulti hangtod sa adlaw nga natuman ang mensahe sa anghel kaniya. Kining Ebanghelyo karon magdasig kanato sa pagsalig sa gahum sa Dios. Dili kita angayng mawad-ag paglaum kay walay dili mahimo ang Dios. Matod pa ni Joel Osteen, "Just because you don't see anything happening doesn't mean God is not working."

pohsiBtebAyU