Lukas 1:46-56

 Ang Santos nga Ebanghelyo sumala ni San Lukas 1:46-56 (Thu. Dec. 22, 2022)

Unya miingon si Maria, “Nagdayeg sa Ginoo ang Akong kalag, ug nagmalipayon Ako diha sa Dios nga Akong Manluluwas, tungod kay nahinumdom Siya Kanako nga Iyang ubos nga sulugoon ! Ug sukad karon ang tanang tawo motawag Kanako'g bulahan, tungod sa mga dagkong butang nga gihimo Kanako sa Gamhanang Dios. Balaan ang Iyang ngalan ; nagpakita Siya'g kaluoy sa tanan nga may kahadlok Kaniya gikan sa usa ka kaliwatan ngadto sa tanang kaliwatan. Gibakyaw Niya ang Iyang kamot nga gamhanan ug gipatibulaag ang mga tawo nga mapahitas-on uban sa tanan nilang laraw. Gipukan Niya ang mga hari nga gamhanan gikan sa ilang mga trono, ug gituboy ang mga timawa. Gibusog Niya sa mga maayong butang ang mga gigutom, ug Iyang gipapahawa nga walay dala ang mga dato. Gituman Niya ang Iyang saad sa atong mga katigulangan. Mitabang Siya kang Israel nga Iyang sulugoon ug nahinumdom Siya pagpakita'g kaluoy kang Abraham ug sa tanan Niyang mga kaliwat hangtod sa kahangtoran !” Mipuyo si Maria ug mga tulo ka bulan uban kang Elisabet ug unya mipauli sa ila.

Pamalandong :

UNSA MAN ANG HAGIT SA AWIT NI MARIA ALANG KANATO KARON ? 

Gipadayag ni Maria ang Iyang pagpasalamat ug pagdayeg sa Ginoo tungod sa mga dagkong butang nga Iyang gihimo para sa katawhan sa Israel. Nasayod si Maria nga ang Ginoo nanginlabot kanunay sa kinabuhi sa mga tawo. Ang katawhan sa Israel gilabanan sa Dios batok sa tanang kaaway. Ug Siya nga ubos nga sulugoon gituboy sa Dios labaw sa tanang binuhat. Atong masabot sa awit ni Maria nga ang Ginoo adunay dakong pagbati sa mga tawo nga anaa sa ubos nga hut-ong sa katilingban, walay tingog, ug dinaugdaog. Kining awita nagdasig sa mga kabos nga dili mawad-an og paglaum tungod kay sila ang labing duol sa kasingkasing sa Dios. Nag-awhag usab kini sa tanan nga motabang sa mga kabos ug makigbatok para sa ilang katungod.  Matod pa ni Buddha, “If you light a lamp for somebody, it will also brighten your path.” 

pohsiBtebAyU