Lukas 1:39-45

 Ang Santos nga Ebanghelyo sumala ni San Lukas 1:39-45 (Wed. Dec. 21, 2022)

Unya nangandam si Maria ug midali pag-adto sa usa ka lungsod sa kabukiran sa Judea. Miadto Siya sa balay ni Zacarias ug nakighimamat kang Elisabet. Sa pagkabati ni Elisabet sa pangomusta ni Maria, milihok ang bata sulod sa iyang tiyan. Unya napuno sa Espiritu Santo si Elisabet ug misulti sa kusog nga tingog, “Bulahan Ka sa tanang mga babaye ! Bulahan ang bata nga Imong ipanganak ! Pagkadako sa akong kalipay nga ang inahan sa akong Ginoo miduaw kanako ! Kay pagkadungog ko gayod sa Imong pangomusta, milukso sa kalipay ang bata nga akong gisabak. Bulahan Ka nga mituo nga matuman gayod ang mensahe sa Ginoo Kanimo !”

Pamalandong :

UNSA MAY BILILHONG GASA NGA ATONG MAHATAG SA ISIGKATAWO NING PASKO ? 

Human masayod nga mahimo Siyang inahan sa Manunubos, ang unang gibuhat ni Maria mao ang pagbisita sa Iyang paryenti nga si Elisabet. Labing siguro, gusto Niyang motabang kang Elisabet nga mabdos usab niadtong higayona sa iyang katigulangon. Labaw sa tanan, buot ni Maria nga ipaambit kang Elisabet ang kalipay nga Iyang gibati tungod sa batang Jesus nga diha sa Iyang sabakan. Kining Ebanghelyo karon magtudlo kanato nga ang kalipay, dili ang mahalong butang, maoy pinakanindot nga pinaskohan nga atong mahatag sa atong isigkatawo. Ang pagbisita, pagtabang, ug pagdala sa gugma ni Kristo maoy gasa nga dili kabayra’g kwarta. Tinuod ang giingon, “The best gifts come from the heart, not from the store.”

pohsiBtebAyU