Lukas 1:26-38/1:39-47

 Ang Santos nga Ebanghelyo sumala ni San Lukas 1:26-38 / San Lukas 1:39-47 (Mon. Dec. 12, 2022)

Sa unom na ka bulan ang gisabak ni Elisabet, gipadala sa Dios ang anghel nga si Gabriel ngadto sa usa ka lungsod sa Galilea nga ginganla'g Nazaret. May mensahe Siya alang sa usa ka batan-ong dalaga nga ulay nga ginganla'g Maria. Kaslonon siya ngadto sa usa ka lalaki nga ginganla'g Jose nga kaliwat ni Hari David. Miadto ang anghel kaniya ug miingon, “Paglipay ! Ang Ginoo nag-uban ug nagpanalangin kanimo pag-ayo !” Nalibog pag-ayo si Maria sa pagkabati niya sa mensahe sa anghel ug namalandong siya kon unsay kahulogan sa iyang mga pulong. Miingon ang anghel kaniya, “Ayaw kahadlok, Maria, kay gikahimut-an ka sa Dios ! Ikaw magsabak ug manganak ug usa ka batang lalaki ug nganlan mo Siya'g Jesus. Mahimo Siyang inila ug tawgon Siya nga Anak sa Dios nga Labing Halangdon. Ang Ginoong Dios maghimo Kaniyang hari, sama sa Iyang kagikan nga si David. Mahimo Siyang hari sa mga kaliwat ni Jacob hangtod sa kahangtoran ug dili gayod matapos ang Iyang gingharian !”Si Maria miingon sa anghel, “Unsaon man pagkahimo niini nga wala man koy bana ?” Ang anghel mitubag, “Mokunsad kanimo ang Espiritu Santo ug magpabilin ang gahom sa Dios diha kanimo. Tungod niini, ang balaan nga bata tawgon nga Anak sa Dios. Hinumdomi ang imong paryenti nga si Elisabet. Giingon nga dili siya makaanak apan karon unom na ka bulan ang iyang pagsabak bisag tigulang na siya kay alang sa Dios walay dili mahimo.” Miingon si Maria, “Sulugoon ako sa Ginoo. Mahitabo unta kanako ang imong gisulti.” Ug mibiya ang anghel kaniya.

Pamalandong :

UNSA MAY ATONG BUHATON KON ADUNAY MAHITABO SA ATONG KINABUHI NGA LISOD SABTON ? 

Human sa pagpahibalo sa anghel, si Maria miingon : “Ulay ako, busa unsaon man pagkahimo niini ?” Nangutana siya dili tungod kay wala siya motuo kondili tungod kay lisod man sabton ang mensahe sa anghel. Unsaon man niya pagmabdos nga wala man siya makighilawas sa iyang minahal nga si Jose ? Apan, bisan sa kalibog, si Maria misalig sa gahum sa Dios ug miingon : “Sulugoon ako sa Ginoo, mahitabo unta kanako ang imong gisulti.” Kining Ebanghelyo karon magdasig unta kanato sa pagsalig sa makaluwas nga gahum sa Dios. Walay dili mahimo ang Dios ug Siya ang labing nasayod unsay maayo para kanato. Sakto ang tambag nga nagkanayon : “God has a reason for allowing things to happen. We may never understand His wisdom, but we simply have to trust His will.”

pohsiBtebAyU