Juan 1:1-18

 Ang Santos nga Ebanghelyo sumala ni San Lukas 2:1-14 / 2:15-20 / San Juan 1:1-18 (Sun. Dec. 25, 2022 Solemnidad Sa Pagkatawo Sa Atong Ginoo)

Sa wala pay nabuhat bisan unsa, ang Pulong diha na. Ang Pulong uban sa Dios ug ang Pulong Dios. Sukad pa gayod sa sinugdan ang Pulong uban sa Dios. Pinaagi kaniya gibuhat sa Dios ang tanan ug walay bisan usa sa tanan nga nabuhat nga dili pinaagi Kaniya. Diha sa Pulong ang kinabuhi ug ang maong kinabuhi mao ang kahayag sa mga tawo. Ang kahayag nagdan-ag diha sa kangitngit ug wala makabuntog niini ang kangitngit. Ang Dios nagpadala ug usa ka tawo nga ginganlag Juan aron pagsaksi ngadto sa mga tawo mahitungod sa maong kahayag aron ang tanan makadungog sa mensahe ug motuo. Si Juan dili mao ang kahayag apan mianhi siya aron pagsaksi mahitungod sa kahayag. Ang matuod nga kahayag moanhi sa kalibotan aron ang tanan madan-agan sa kahayag. Ang Pulong dinhi na sa kalibotan. Pinaagi kaniya gibuhat sa Dios ang kalibotan apan ang kalibotan wala moila Kaniya. Mianhi Siya sa Iyang kaugalingong katawhan apan wala sila modawat Kaniya. Apan kadtong midawat ug misalig Kaniya gihatagan Niya sa katungod nga mahimong mga anak sa Dios. Nahimo silang mga anak sa Dios dili sa tawhanong paagi o pagbuot. Ang Dios mismo mao ang naghimo kanilang Iyang mga anak. Ug ang Pulong nahimong Tawo ug mipuyo uban kanamo, puno sa grasya ug kamatuoran. Nakita namo ang Iyang himaya, ang himaya nga Iyang nadawat ingon nga bugtong Anak sa Amahan. Misaksi si Juan mahitungod Kaniya ug misinggit, “Siya ang akong gipasabot sa akong pag-ingon, ‘Siya nga moabot sunod kanako labaw kanako kay diha na man Siya sa wala pa ako matawo.’ ” Gikan sa naghingapin Niyang grasya kitang tanan gihatagan Niya sa walay puas nga panalangin. Ang Balaod gihatag sa Dios pinaagi kang Moises apan ang grasya ug ang kamatuoran miabot pinaagi kang Jesu-Cristo. Wala pa gayoy tawo nga nakakita sa Dios. Ang bugtong Anak nga Dios nga pinangga kaayo sa Amahan maoy nagpaila Kaniya.

Pamalandong :

NGANONG NAGPAKATAWO MAN ANG ATONG GINOO UG MIPUYO PA GAYOD UBAN KANATO ?

Dihay hari nga nahigugma sa usa ka babaye nga anak sa ordinaryong mag-uuma. Gusto niya kining pakaslan og himoong rayna sa iyang gingharian. Apan unsaon man niya pagsuta nga kining maong babaye mahigugma usab sa tinuoray kaniya. Mahadlok man siya nga magpakasal lamang ang babaye kaniya tungod kay hari man siya, adunahan ug gamhanan. Adunay dakong puruhan nga higugmaon sa babaye ang iyang katigayonan ug gahum, apan dili ang iyang pagkatawo. Galibog ang hari ug nangayo siya sa hunahuna sa iyang mga magtatambag. Apan ang tanan miingon : “Ayaw na kabalaka mahal nga hari. Walay babaye nga dili mahigugma kanimo. Ambongan ka ug gamhanan. Anaa kanimo ang tanan.” Wala makontento ang hari ning maong tubag. Usa ka adlaw niana, sekreto siya nga migawas sa iyang palasyo. Nagsul-ob siya'g ordinaryo nga bisti ug nagtakoban isip usa ka mag-uuma. Didto siya mipuyo uban sa katilingban sa babaye nga iyang gihigugma. Gitagoan niya ang iyang pagkahari ug sa hinayhinay iyang gipadayag sa maong babaye ang iyang pagbati. Sa dihang misugot kini nga magpakasal sila, ang hari malinawon ug kumbinsido siya nga ang maong babaye tiunay nga nahigugma kaniya. 

Ang gibuhat sa maong hari mao usab ang gibuhat sa Ginoo ngadto sa tawo. Mianhi Siya sa kalibotan ug nahimong anak sa usa ka karpentero. Wala gyud Siya magpakahari ; hinoon, gipuy-an Niya ang Iyang giingon : “Ang labing dako sa gingharian sa langit mao siya nga andam mahimong sulugoon sa tanan.” Siya mismo nagpakasulugoon – nag-alagad sa mga tawo, ilabi na sa mga kabos ug masakiton. Tungod niini, daghan ang wala modawat Kaniya ug gani mipasipala Kaniya. Napamatud-an sa Hari nga ang gugma sa daghang mga tawo para sa Dios dili tinuod. “Siya nga moingon, 'Nahigugma ako sa Dios, apan wala mahigugma sa iyang isigkatawo, usa ka bakakon.'”

Mangutana kita karon sa atong kaugalingon : Nahigugma ba kita sa Dios sa tinuoray gayud ? Nahigugma ba kita Kaniya ug tungod niini nagtarong kita sa atong kinabuhi ? Dili kaha mosimba lamang kita ug magbuhat og maayo tungod kay aduna kitay buot pangayoon sa Ginoo ? Basin baya og nag-apas lamang kita sa ganti sa Dios nga atong gustong dawaton pinaagi sa pag-ampo ug pagpangaliyupo.

Niining kapaskohan, dili unta kita malimot nga kining Dios nga nagpakatawo nakig-uban kanato aron sukdon ang kamatinud-anon sa atong gugma. Hangtud karon, ania Siya nakig-uban kanato, nagtakoban sa daghang paagi. “Ang inyong gibuhat sa labing ubos nakong igsoon, inyong gibuhat kanako.” Ang Hari ania gihapon uban kanato nagtakoban isip kabos nga trabahante, silingan nga masakiton, tawo nga gigutom, pobre nga kulang sa bisti, biktima sa trahedya, katabang sa balay nga walay grado, tigulang nga nagmamingawon, ug sa uban pang mga paagi. Ang ato diay'ng gugma sa Dios mapamatud-an lamang pinaagi sa atong paghigugma sa  isigkatawo nga may panginahanglan.

Malipayong Pasko ug bulahang bag-ong tuig kanatong tanan !

pohsiBtebAyU