Mateo 24:37-44

 Ang Santos nga Ebanghelyo sumala ni San Mateo 24:37-44 (Sun. Nov. 27, 2022 Unang Domingo Sa Adbiyento)

Ang pag-abot sa Anak sa Tawo mahisama sa nahitabo sa panahon ni Noe. Sama sa mga adlaw sa wala pa ang lunop, ang mga tawo nagpadayon sa naandan nilang buluhaton sama sa pagkaon ug pag-inom ug pagminyoay, hangtod gayod sa adlaw nga misulod si Noe sa arka. Apan wala sila masayod sa nahitabo hangtod nga ang lunop miabot ug mibanlas kanilang tanan. Sama unya niini ang mahitabo inig-abot sa Anak sa Tawo. Niadtong panahona, duha ka tawo magtrabaho sa uma : ang usa kuhaon ug ang usa ibilin. Duha ka babaye maggaling ug pagkaon : ang usa kuhaon ug ang usa ibilin. Busa pagbantay kamo kay wala kamo masayod kon unsang adlawa moanhi ang inyong Ginoo. Hinumdomi kini : kon ang agalon sa panimalay nasayod pa unta unsang taknaa sa gabii moabot ang kawatan, magtukaw gayod siya ug dili motugot nga ang kawatan molungkab sa balay. Busa kamo usab kinahanglan mag-andam kanunay kay moabot ang Anak sa Tawo sa takna nga kamo wala magpaabot Kaniya.

Pamalandong :

UNSA MAN ANG ADBIYENTO ?

Karon mao ang unang adlaw sa Liturhikanhong Kalendaryo sa Simbahan. Daghang mga tawo ang wala masayud nga kita gasunod og laing kalendaryo para sa atong kinabuhing Kristohanon. Ang kalendaryo sa kalibutan gimugna sa lain-laing panahon sama sa panahon sa ting-init, ting-ulan ug ting-tugnaw. Sa susamang paagi, ang liturhikanhong kalendaryo aduna usay lain-laing panahon sama sa adbiyento, kwaresma, pagkabanhaw, ug uban pa. Dinhi sa kalendaryo sa Simbahan, ang matag panahon adunay kalambigitan sa mga misteryo sa kinabuhi ni Kristo. Gituyo kini aron nga ang atong inadlaw-adlaw nga kinabuhi mahisubay gayud sa kinabuhi sa Diyos.

Ang unang bahin sa Liturhikanhong Kalendaryo mao ang panahon sa Adbiyento, nga atong gisugdan karong Domingoha. Ang pulong “adbiyento” nagagikan sa Latin nga adventus nga nagpasabut og “pag-abut”. Gigamit nato kining maong pulong aron itawag sa panahon kanus-a atong gipaabut ang Ginoo nga Manluluwas. Upat kini ka Domingo padulong sa Pasko sa Pagkatawo ni Kristo ug gisimbolohan sa upat ka kandila sa Advent Wreath. Ang dakong tema sa Adbiyento mao ang “pagpaabot ug pagbantay”. Kitang tanan gihagit nga magpabiling mabinantayon o mag-andam kanunay alang sa klase-klaseng pag-abut sa Ginoo sa atong kinabuhi.

Una sa tanan, ang mga semana sa Adbiyento maoy panahon sa pag-andam para sa adlaw sa Pasko, kanus-a atong handumon ang pagpakatawo sa Ginoo. Ato kining saulogon uban sa kasingkasing nga mapasalamaton tungod kay dinhi atong mabati nga kita gihigugma pag-ayo sa Dios. Ang Ginoo nagpakatawo ug nahisama kanato uban sa tuyo nga kita mahisama Kaniya. Ang Dios maoy mihimo og lakang aron kita mahiuli ug mahiusa Kaniya. Ang liturhikanhong kolor sa Adbiyento mao ang violet o purple nga magpakita nga kini usa ka panahon sa paghinolsol. Aron mahimong makahuluganon ang pasko, angay kitang magbag-o sa kinabuhi, magbasol sa mga sala ug maghini-uliay sa maayong pagtinagdanay.

Ikaduha, ang Adbiyento nagdasig kanato nga magbantay sa pagduaw sa Ginoo sa inadlaw-adlaw natong kinabuhi. Sa mosunod nga Domingo sa Adbiyento, ang Ebanghelyo magsaysay mahitungod ni San Juan Bautista nga maoy magpaila kang Kristo, ang Dios nga anaa nakig-uban sa mga tawo. Kaniadto, si Jesus nagpuyo taliwala sa mga tawo, apan pipila lang ang nakabantay Kaniya. Karon, Siya ania gihapon sa atong taliwala pinaagi sa Espiritu Santo, apan pipila lang ang naghatag og bili sa Iyang pagpakig-uban kanato. Ang Adbiyento nagdapit kanato sa paghatag og pagtagad sa presensya ni Kristo sa atong kinabuhi. Siya atong ikahibalag diha sa Santos nga Misa, sa Kristohanong katilingban, ug sa matag tawo nga nanginahanglan og tabang.

Ug sa katapusan, ang Adbiyento nagpahinumdum kanato nga mangandam alang sa atong umaabut nga pag-atubang sa Ginoo. Kini mahitabo sa adlaw sa pagbalik ni Kristo sa katapusan sa panahon nga mao usab ang adlaw sa paghukom. Ang Ebanghelyo nagpahimangno kanato nga ang “Anak sa Tawo” moabut sa takna nga wala nato damha, sama sa dakong lunop nga nahitabo sa panahon ni Noe. Miabut ang lunop samtang ang mga tawo nangaon, nanginom ug nagminyoay. Nga sa ato pa, wala gyuy timailhan nga nakapaandam kanila nga maglunop na. Ingon usab kuno niini ang mahitabo sa adlaw sa pagbalik ni Kristo. Walay “last call” or “warning signs.” Busa, ang hagit sa Simbahan mao kini : Pagmata kanunay ! Ayaw pagpiyong-piyong ! Pagpabiling mabinantayon ! Adunay nag-ingon : “Ang tawo nga mapakyas sa pagpangandam tabla ra nga nangandam sa iyang kapakyasan.”

Unsaon man nato nga magpabiling mabinantayon sa pag-abut sa Ginoo ? Diha sa ikaduhang pagbasa, Si San Pablo naghatag og practical advice : "Pagpuyo kamo kanunay isip mga anak sa kahayag ug likayi ang tanang buhat nga salawayon." Gipasabut ni Pablo nga angay kitang manginabuhi nga maligdong ug likayan ang daotang mga buhat sama sa paghuboghubog, pagpangaway, pagdinaotay, kasina, ug uban pa.

Ang panahon sa Adbiyento usa ka maayong pahinumdum nga ang matag adlaw sa atong kinabuhi atong gayong gamiton sa pagpangandam alang sa atong pagpakigkita sa Ginoo. Manglimpiyo ta kada adlaw (dili kada semana, dili kada bulan) aron sa tanang panahon andam kita sa pagpakig-uban sa Ginoo !

pohsiBtebAyU