Lukas 21:5-19

 Ang Santos nga Ebanghelyo sumala ni San  Lukas 21:5-19 (Sun. Nov. 13, 2022 Ikakatloag-Tulo Nga Domingo Sulod Sa Tuig)

Dihay pipila kanila nga naghisgot bahin sa Templo kon unsa kini katahom tan-awon nga gidayandayanan sa maanindot nga mga bato ug sa mga gasa nga gihalad ngadto sa Dios. Unya miingon si Jesus, “Nakita ninyo kining tanan apan moabot ang panahon nga walay bisan usa ka bato nga magpabilin sa nahimutangan niini kay ang tanan tumpagon gayod.” “Magtutudlo,” nangutana sila, “kanus-a ba kini mahitabo ? Ug unsa man ang ilhanan nga moabot na ang panahon nga kini matuman ?” Si Jesus miingon, “Pagbantay kamo ug ayaw kamo palimbong kay daghan ang moanhi sa Akong ngalan nga mag-ingon, ‘Ako mao si Cristo !’ ug moingon usab, ‘Miabot na ang panahon !’ Apan ayaw sila tuohi. Ayaw kamo kahadlok kon makadungog kamog mga gubat ug mga kagubot kay kining mga butanga kinahanglan nga mahitabo gayod pag-una apan wala kini magpasabot nga mao na kini ang kataposan.” Mipadayon Siya pag-ingon, “Ang usa ka nasod makiggubat sa laing nasod ug ang usa ka gingharian mosulong sa laing gingharian. Mahitabo unya ang makalilisang nga mga linog, gutom ug kamatay sa lainlaing dapit ingon man ang makahahadlok nga mga butang ug mga dagkong ilhanan gikan sa langit. “Apan sa dili pa mahitabo kining mga butanga, dakpon kamo ug lutoson. Dad-on kamo ngadto sa mga sinagoga ug bilanggoon ug dad-on kamo atubangan sa mga hari ug sa mga gobernador tungod Kanako. Mao unya kini ang higayon nga makasangyaw kamo sa Maayong Balita. Sa dili pa kini mahitabo, usaha ang inyong hunahuna nga dili kamo mabalaka kon unsaon ninyo pagtubag kay hatagan Ko kamog igsusulti ug kaalam nga walay usa sa inyong mga kaaway nga makatubag o makasupak. Budhian kamo bisan gani sa inyong mga ginikanan ug mga igsoon ingon man sa inyong mga kadugo ug mga higala ug patyon nila ang uban kaninyo. Kasilagan kamo sa tanan tungod Kanako apan walay bisan usa ka buhok sa inyong ulo nga mawala. Pinaagi sa inyong paglahutay maluwas kamo.

Pamalandong :

UNSA MAY ANGAYAN NATONG  BUHATON SA ADLAW NGA KITA PAGAHUKMAN NA SA ATONG GINOO ?

Ning naghinapos nga mga adlaw sa Liturhikanhong Kalendaryo, buot sa Simbahan nga kita mamalandong sa umaabot nga katapusang mga adlaw sa kalibotan ug sa atong kamatayon, kanus-a kita moatubang sa Dios nga Maghuhukom. Sa unang pagpaminaw, daghan kanato maguol, makuyawan, o gani malisang nga makadungog mahitungod ning mga butanga. Pero, angayan ba gayod kitang mahadlok nga maghisgot o mamalandong niini ?Mahadlok kita kon ang atong panan-aw mapunting lamang sa mga kalisod, hagit ug mga pagsulay sa umaabot, sama sa mga gira, linog, sakit, kagutom ug mga pagpanglutos. Diha sa Ebanghelyo, si Jesus nagtudlo nga kining mga butanga mag-una gayod sa pagkahitabo, apan gidasig kita Niya nga magpabiling lig-on tungod kay dili man kita pasagdan sa Dios. Gani, gipasaligan kita Niya nga bisan ang usa ka lugas natong buhok iya gayong panalipdan. Imbis nga kahadlokan, ang kasakit ug ang pagpanglutos angay natong isipon nga kahigayonan sa pagpamatuod sa atong gugma ug pagsunod Kaniya. Kini maoy magdala kanatog kaluwasan ug kinabuhing walay katapusan. Angay lamang usab kitang malisang sa pag-abot sa katapusang adlaw kon ang atong kinabuhi wala magsunod sa kabubut-on sa Dios, o kon kita giharian sa pagkadaotan. Sa unang pagbasa, si propeta Malachi nanagna nga muabot ang adlaw, kanus-a hatagan og ganti ang mga tawong matarong nga naningkamot pagpuyo sa kagustohan sa Dios. Nagpasidaan usab siya nga sa maong adlaw, paninglan ang mga tawong daotan ug pabayron sa ilang salawayong mga buhat. Kon kita naningkamot nga magtarong, kon kita naninguha sa pagsunod sa mga sugo sa Dios, ug kon kita makamaong mangayo og pasaylo, nganong malisang man kita nga moatubang sa Dios nianang panahona ? Nilamdagan sa kamatuoran nga ang adlaw sa Ginoo o ang adlaw sa paghukom muabot gayod, unsa may angay natong buhaton ? Una, ang katapusan sa panahon angay natong paaboton uban sa kahinangop ug dakong pagsalig, dili sa kabalaka ug kahadlok. Adunay mga tawo nga managna ug mohatag og petsa kanus-a kini mahitabo. Motuo ba kita nila? Angay ba kitang malisang sa ingon niining panagna? Dili ug dili gayod angay. Si Jesus mismo ang nagtudlo nga dili kita angay maminaw kanila. Ug dili usab kita angay nga harian sa kahadlok. Ang adlaw sa paghukom maoy maghatag og hustisya sa tanan nga nahitabo sa atong kinabuhi, ang kadaogan sa kaayo batok sa daotan. Si Jesus, ang Ginoo nga atong gisimba ug gisunod, maoy maghatag kanato og kadaogan batok sa daotan ug sa sala. Ug ikaduha, ang dili kalikayan nga pag-abot sa adlaw sa kamatayon ug sa paghukom angay nga magdasig kanato sa pagsaksi matag adlaw sa Ebanghelyo ni Kristo. Ang mga sumusunod ni Kristo dili mahimong magtinapol, magkumpyansa, o mag-usik-usik sa panahon. Kini ang pahimangno ni San Pablo ngadto sa taga Tesalonika nga wala na maglihok tungod kay naghunahuna sila nga hapit na mobalik ang Ginoo. Dili kini ang angay natong sundon. Ang katapusan sa panahon muabot sa pagbuot sa Dios. Bisan tuod wala kita masayod kanus-a kini mahitabo, dili kita angay nga magpasagad. Samtang nagpaabot sa maong panahon, angay kitang magpuyo ug magbuhat sa inadlaw-adlaw nga buluhaton ug responsabilidad, sa hilom nga paagi, uban sa kamatinud-anon ug sa dakong gugma, para sa kaayohan sa katilingban sa Dios.

pohsiBtebAyU