Lukas 19:1-10

 Ang Santos nga Ebanghelyo sumala ni San Lukas 19:1-10 (Tue. Nov. 15, 2022)

Si Jesus miabot sa Jerico ug samtang miagi Siya, may usa ka dato nga ginganla'g Saqueo nga pangulo sa mga kobrador sa buhis. Naninguha siya pagtan-aw kon kinsa si Jesus. Apan mubo si Saqueo ug wala siya makakita kang Jesus tungod sa panon sa mga tawo. Busa midagan siya una sa panon ug misaka sa kahoyng sikomoro aron makakita siya kang Jesus nga moagi niadtong dalana. Sa pag-abot na ni Jesus niadtong dapita, mihangad Siya sa kahoy ug miingon kang Saqueo, “Kanaog dayon, Saqueo, kay adto ako moabot sa imong balay karong adlawa.” Midali pagkanaog si Saqueo ug sa dakong kalipay midawat kang Jesus. Ang tanan nga nakakita niini nagbagulbol, “Kining tawhana namisita sa balay sa usa ka makasasala !”Ug mitindog si Saqueo ug miingon sa Ginoo, “Sir, paminaw ! Ihatag ko ang katunga sa akong katigayonan ngadto sa mga kabos ug kon ako nakalimbong kang bisan kinsa, ulian ko siya'g upat ka pilo.” Si Jesus miingon kaniya, “Karong adlawa miabot ang kaluwasan niining balaya kay kining tawhana kaliwat usab ni Abraham. Kay mianhi ang Anak sa Tawo aron pagpangita ug pagluwas sa nawala.”

Pamalandong :

UNSA MAN ANG TINUOD NGA PAGHINULSOL SA SALA ? 

Si Saqueo wala malipay sa iyang kahimtang. Anaa siya sa ibabaw sa katilingban, apan gibati siya'g dakong kamingaw. Adunahan siya, apan wala siyay kahigalaan. Mao kini ang bunga sa iyang daotang binuhatan. Karon, gusto na siyang magbag-o ug mobalik sa Ginoo. Giingnan niya si Jesus : “Katunga sa akong mga kabtangan, Ginoo, ihatag nako sa mga kabos, ug kon aduna man ganiy akoy nalimbongan sa bisan unsa, ulian nako siya'g upat ka pilo.” Aron maangkon ang kaluwasan, andam si Saqueo nga mobiya sa tanan niyang katigayonan. Kining Ebanghelyo karon nagtudlo kanato nga ang matinud-anong pagbasol pagaubanan gayod og dakong tinguha sa pag-ayo sa mga relasyon nga nadaot. Sakto ang giingon, “True repentance involves a change of heart and not just a change of behavior.”

pohsiBtebAyU