Juan 2:13-22

 Ang Santos nga Ebanghelyo sumala ni San Juan 2:13-22 (Wed. Nov. 9, 2022 Dedikasyon Sa Basilika Sa Letran)

Niadtong higayona hapit na ang Kasaulogan sa Pagsaylo busa miadto si Jesus sa Jerusalem. Didto sa hawanan sa Templo nakita Niya ang mga tawo nga namaligya'g mga baka, mga karnero ug mga salampati. Nakita usab Niya ang mga tig-ilis ug kuwarta. Unya si Jesus naghimo'g latigo nga pisi ug giabog Niya ang tanang mananap—ang mga karnero ug mga baka—ngadto sa gawas sa templo. Giyabo usab Niya ang mga sinsilyo sa mga tig-ilis ug kuwarta ug gilintuwad ang ilang mga lamisa. Ug Iyang gimandoan ang mga tawo nga namaligya'g mga salampati, “Dad-a kini sa gawas ! Ayaw ninyo himoang merkado ang balay sa Akong Amahan.” Unya nahinumdom ang Iyang mga tinun-an nga ang kasulatan nag-ingon, “Ang Akong pagmahal sa Imong balay, O Dios, nagdilaab sulod Kanako sama sa kalayo.” Tungod sa gibuhat ni Jesus nangutana Kaniya ang kadagkoan sa mga Judio, “Unsay ilhanan nga ikapakita Mo aron pagmatuod nga may katungod Ka pagbuhat niini ?” Si Jesus mitubag, “Gub-a ninyo kining maong Templo ug tukoron Ko kini pag-usab sulod sa tulo ka adlaw.” Sila miingon Kaniya, “Kining Temploha gibuhat sa sulod sa 46 ka tuig unya tukoron Mo kini pag-usab sulod lang sa tulo ka adlaw ?” Apan ang templo nga gihisgotan ni Jesus mao ang Iyang lawas. (Busa sa dihang nabanhaw na Siya, nahinumdom ang Iyang mga tinun-an nga gisulti Niya kini ug mituo sila sa kasulatan ug sa gisulti ni Jesus.)

Pamalandong :

NGANONG SAGRADO MAN ANG BALAY ALAMPOANAN ? 

Si Jesus mismo ang nagtawag sa templo nga “Balay sa Iyang Amahan”. Nasuko Siya sa dihang Iyang nakita ang mga tawo didto sa templo nga namaligya'g mga hayop ug nangilis og mga kwarta tungod kay para Kaniya usa kini ka pagpanamastamas sa Balay sa Dios. Ang templo usa ka sagradong lugar ; dinhi ang mga tawo mag-ampo ngadto sa ilang Langitnong Amahan. Dili kini sama sa merkado nga mahimo ang pagsaba-saba, pagpanguwarta ug pagpamintaha. Kining Ebanghelyo magpahimangno kanato sa paghatag og dakong pagtahod sa matag Simbahan o Balay Alampoanan. Ampingan nato ang iyang kahilom ug kalimpyo. Mosulod kita niini uban ang saktong linihokan, pamiste, hunahuna ug pagbati. 

pohsiBtebAyU