Lukas 14:1,7-11

 Ang Santos nga Ebanghelyo sumala ni San Lukas 14:1,7-11 (Sat. Oct. 29, 2022)

Usa niana ka Adlaw'ng Igpapahulay miadto si Jesus sa balay sa usa sa mga inilang Pariseo aron mokaon ug gipanid-an Siya pag-ayo sa mga tawo. Namatikdan ni Jesus nga dihay pipila sa mga bisita nga nagpili sa labing pinasidunggang dapit sa kan-anan busa misugilon Siya niining sambingaya ngadto kanilang tanan : “Kon dapiton gani kamo sa usa ka kombira sa kasal, ayaw kamo paglingkod sa labing pinasidunggang dapit sa kan-anan kay tingali unya'g may laing dinapit nga labi pang halangdon kay kanimo ug ang nagdapit kaninyong duha moduol ug moingon kanimo, Siyay palingkora diha.’ Unya maulawan ka ug mapugos paglingkod sa labing ubos nga dapit. Apan, kon dapiton ka, adto hinuon lingkod sa labing ubos nga dapit aron ang nagdapit kanimo moduol ug moingon : ‘Higala, balhin ngari sa pinasidunggang dapit.’ Sa ingon niini, kapasidunggan ka sa atubangan sa tanang dinapit. Kay kadtong magpataas ipaubos ug ang magpaubos ipataas.”

Pamalandong :

UNSA MAN ANG TINUOD NGA PAGPAUBOS ? 

Karong adlawa gihatagan kita ni Jesus og hulagway sa tawong mapaubsanon. Siya ang tawo nga dili mangandoy sa pagdayeg sa uban. Dili siya makig-ilog sa taas nga hut-ong sa katilingban. Dili siya mamintaha ug maniguro para sa iyang kaugalingon. Ang maong tawo magpaulahi dili tungod kay maglikay siya nga mahago o mahasol, kondili tungod kay gusto niyang ipahiluna ang uban una sa iyang kaugalingon. Siya ang tawo nga mahimong dako atubangan sa Ginoo tungod kay “ang magpataas ipaubos, ug ang magpaubos ipataas”. Kining Ebanghelyo karon magdasig kanato sa pagpabiling mapaubsanon ug manggihunahunaon sa isigkaingon. Sakto si C.S. Lewis sa iyang pag-ingon, “True humility is not thinking less of yourself ; it is thinking of yourself less.”

pohsiBtebAyU