Lukas 12:39-48

 Ang Santos nga Ebanghelyo sumala ni San Lukas 12:39-48 (Wed. Oct. 19, 2022)

Ug timan-i kini : kon nahibalo pa ang tagbalay kanus-a moabot ang kawatan, dili gayod siya motugot nga lungkabon sa kawatan ang iyang balay. Busa kamo usab kinahanglan mangandam kay ang Anak sa Tawo moabot sa oras nga wala ninyo paabota.” Unya miingon si Pedro, “Ginoo, nagsugilon Ka ba niining sambingaya alang kanamo lamang o gitumong Mo ba kini sa tanan ?” Ang Ginoo mitubag, “Kinsa ba diay ang buotan ug maalamon nga sulugoon nga maoy tugyanan sa iyang agalon pagdumala sa panimalay ug paghatag sa ubang mga sulugoon sa ilang bahin sa pagkaon sa husto nga panahon ? Bulahan kadtong sulugoon nga makaplagan sa iyang agalon nga nagtuman niini sa paghiuli niya. Sultihan Ko kamo : ang agalon maghimo niadtong maong sulugoon nga tinugyanan sa tanan niyang katigayonan. Apan kon kadtong maong sulugoon moingon sa iyang kaugalingon, ‘Dugay pa moabot ang akong agalon’ ug unya mosugod siya pagpamunal sa kauban niyang mga sulugoon nga lalaki ug babaye ug magpalabig kaon ug inom ug maghuboghubog, ug unya mahibalik ang agalon usa niana ka adlaw nga wala paabota sa sulugoon ug sa panahon nga wala niya hibaloi, tagodtagoron siya sa iyang agalon ug pahiagomon sa gidangatan sa ubang tampalasan nga sulugoon. “Ang sulugoon nga nasayod unsa ang buot ipabuhat kaniya sa iyang agalon apan dili mag-andam ug dili magtuman sa ipabuhat, latoson sa makadaghan. Apan ang sulugoon nga wala masayod unsa ang gusto sa iyang agalon unya makabuhat ug butang nga tungod niini angay siyang latoson, silotan sa diyutay nga latos. Ang tawo nga gihatagag daghan, paninglag daghan. Apan ang gihatagag daghan pa gayod, paninglan usab ug mas daghan pa.

Pamalandong :

UNSA MAY ATONG MAKUHANG PAGTULON-AN SA SAMBINGAY SA MGA SULUGOON ? 

Kini magpahinumdum kanato nga kitang tanan mga piniyalan lamang sa Dios. Angay kitang mag-amping sa mga butang nga atong gihuptan – sama sa kinabuhi, bahandi ug talento – ug mogamit niini alang sa paghimaya sa Iyang Ngalan. Isip mga piniyalan, gitahasan kita sa pagpalambo ug paggamit sa mga gasa sa Dios alang sa kaayohan sa tanan. Bulahan kita kon gigamit nato'g maayo ang mga gasa tungod kay maangkon nato ang ganti sa Langit. Apan, alaot kita kon mag-abuso sa mga gasa ug magdaugdaog sa atong isigkatawo tungod kay maato ang dakong silot. Adunay nag-ingon : “All around you there are people who are hurting, people who need your love, people who need your encouragement. Let God use your talents and gifts to bless them.”

pohsiBtebAyU