Lukas 11:47-54

 Ang Santos nga Ebanghelyo sumala ni San Lukas 11:47-54 (Thu. Oct. 13, 2022)

Pagkaalaot ninyo ! Nagbuhat kamo ug nindot nga mga lubnganan alang sa mga propeta nga gipatay sa inyong mga katigulangan. Sa ingon niini kamo mismo miangkon nga kamo miuyon sa gibuhat sa inyong mga katigulangan kay sila maoy nagpatay sa mga propeta ug kamo ang nagbuhat sa ilang mga lubnganan. Tungod niini ang Kaalam sa Dios nag-ingon, ‘Padad-an Ko silag mga propeta ug mga sinugo ug ilang lutoson ang uban ug ang uban ilang patyon.’ Busa paninglan ang mga tawo niining panahona tungod sa ilang pagpatay sa tanang mga propeta sukad pa sa pagbuhat sa kalibotan gikan sa pagpatay kang Abel ngadto sa pagpatay kang Zacarias nga gipatay taliwala sa halaran ug sa balaan nga dapit. Oo, sultihan Ko kamo silotan gayod ang mga tawo niining panahona tungod niining tanan ! “Pagkaalaot ninyong mga magtutudlo sa Balaod ! Gitipigan ninyo ang yawi nga maoy moabli sa pultahan sa kahibalo apan kamo mismo wala mosulod ug gisanta ninyo ang buot mosulod niini !” Sa dayong biya ni Jesus niadtong dapita, gisaway Siya pag-ayo sa mga magtutudlo sa Balaod ug sa mga Pariseo ug nangutana sila Kaniya mahitungod sa daghang mga butang. Gisulayan nila Siya paglit-ag aron masakpan siya nga nasayop sa Iyang gisulti.

Pamalandong :

KINSA MAN ANG MAAYONG MAGTUTUDLO ? 

Ang mga magtutudlo sa Balaod gitahasan sa pagpasabot sa kahulogan sa Balaod ngadto sa katawhan sa Dios. Dako ang ilang papel sa kinabuhing moral sa mga tawo. Apan, gisaway sila ni Jesus tungod kay wala man nila sunda ang espiritu sa Balaod ug nahimo silang babag sa mga tawo nga makatuman sa kabubut-on sa Dios. Kining Ebanghelyo karon maoy usa ka dakong hagit para sa mga ginikanan, mga magtutudlo, ug mga pangulo sa Simbahan. Anaa kanila ang katungdanan sa pagpasabut sa kabubut-on sa Dios ngadto sa mga anak, mga estudyante, ug mga parokyano. Matuman nila kini kon sila makamaong mag-ampo, mamalandong ug magpuyo sa Kristohanong pagtulon-an nga ilang itudlo. Adunay panultihon nga nagkanayon : “A good teacher is like a candle – it consumes itself to light the way for others.”

pohsiBtebAyU