Lukas 11:42-46

 Ang Santos nga Ebanghelyo sumala ni San Lukas 11:42-46 (Wed. Oct. 12, 2022)

“Pagkaalaot ninyong mga Pariseo ! Naghatag kamo ngadto sa Dios sa ikapulo ka bahin sa mga lamas ingon sa herbabuyna ug kaningag ug uban pang utanon. Apan wala ninyo hatagi'g pagtagad ang hustisya ug ang gugma sa Dios. Kinahanglan ninyong buhaton kining mga butanga sa walay pagpasagad sa ubang mga butang. “Pagkaalaot ninyong mga Pariseo ! Gusto kamo sa labing maayong mga lingkoranan sulod sa mga sinagoga ug yukboan kamo didto sa mga merkado. Pagkaalaot gayod ninyo ! Sama kamo sa mga lubong nga walay timaan nga wala lamang hibaloi sa mga tawo nga ila diay'ng gitamakan.” Unya usa sa mga magtutudlo sa Balaod miingon Kaniya, “Magtutudlo, sa Imong pagsulti niini Imo usab kaming gipakaulawan !” Si Jesus mitubag, “Pagkaalaot usab ninyong mga magtutudlo sa Balaod ! Gipapas-an ninyo ang mga tawo sa makabuktot nga palas-anon apan kamo mismo dili man gani mohikap niini bisan sa usa na lang ka tudlo ninyo aron pagtabang kanila.

Pamalandong :

UNSA MAY HALAD NGA MAKALIPAY SA GINOO ? Gisaway ni Jesus ang mga Pariseo : “Pagkaalaut ninyong mga Pariseo ! Naghatag kamo ngadto sa Dios sa ikapulo ka bahin sa mga lamas . . .  apan nagpasagad kamo sa hustisya ug sa gugma sa Dios.” Ang paghatag sa Ginoo og bahin sa mga bunga sa atong tanum, trabaho, o negosyo usa ka maayong buhat. Pinaagi niini, atong giila nga ang Dios maoy gigikanan sa tanang grasya ug nga Siya ang angay'ng pasalamatan. Apan, mag-amping usab kita nga sa pagpangita’g kabuhian dili kita manikas ug mamintaha sa atong isigkatawo. Sa pagpasalamat sa Ginoo diha sa Iyang templo, nindot kaayo nga atong dalhon ang mga bunga sa limpyo natong binuhatan ug negosyo. Ang Hebreo 13:16 nag-ingon : “Do not forget to do good and to share with those in need, for such sacrifices are pleasing to God.”

pohsiBtebAyU