Lukas 9:46-50

 Ang Santos nga Ebanghelyo sumala ni San Lukas 9:46-50 (Mon. Sept. 26, 2022)

Unya naglalis ang mga tinun-an kon kinsa ang labing dako kanila. Apan nahibalo si Jesus sa ilang gihunahuna busa mikuha Siya'g usa ka bata ug gipatindog sa Iyang kiliran. Ug miingon Siya kanila, “Ang modawat niining bata sa Akong ngalan, modawat Kanako ug ang modawat Kanako, modawat usab Kaniya nga nagpadala Kanako. Kay ang labing ubos kaninyong tanan mao ang labing dako.” Si Juan miingon Kaniya, “Magtutudlo, nakakita kami'g tawo nga naghingilin ug mga yawa pinaagi sa Imong ngalan ug amo siyang gidid-an kay dili man siya sakop sa atong pundok.” Ayaw siya pagdid-i,” miingon si Jesus kaniya ug sa ubang mga tinun-an, “kay ang dili batok kaninyo dapig kaninyo.”

Pamalandong :

NGANONG DILI MAN KITA ANGAY’NG MAGMAPAHITAS-ON ? 

Si Saint Vincent de Paul nag-ingon, “Ang garbo maoy atong pinakadakong kaaway tungod kay kini maoy tuboran sa tanang daotan ug kalaglagan sa tanang maayo.” Tinuod kini sumala sa atong kasinati-an. Kon garbo maoy maghari, anaa ang pagsumpaki-ay, pagdinaotay ug pagdinumtanay. Likayan gayod nato nga mahimong garboso tungod kay matod pa sa libro ni Santiago : “Ang Ginoo makigbatok sa mga mapahitas-on, apan maglaban Siya sa mga mapaubsanon (4:6).  Diha sa Ebanghelyo, gidasig kita ni Jesus nga magmapaubsanon tungod kay ang labing ubos sa tanan maoy ilhong labing dako didto sa Langit. Sakto ang gisulat : “Being humble is more important than being wise because God doesn’t need a proud mouth that speaks much, but a kind heart that listens.”

pohsiBtebAyU