Lukas 6:6-11

 Ang Santos nga Ebanghelyo sumala ni San Lukas 6:6-11   (Mon. Sept. 5, 2022)

Sa laing Adlaw'ng Igpapahulay, misulod si Jesus sa usa ka sinagoga ug nagtudlo. Didtoy usa ka tawo nga kimay ang tuong kamot. Pipila sa mga magtutudlo sa Balaod ug mga Pariseo naniid kang Jesus kon manambal ba Siya sa mga masakiton sa Adlaw'ng Igpapahulay. Gihimo nila kini aron pagpangita ug igong katarongan aron ikasumbong nila si Jesus nga nagbuhat ug kalapasan. Apan nahibalo si Jesus sa ilang gihunahuna ug Iyang giingnan ang tawo nga kimay, “Tindog ug dali ngari sa atubangan.” Ug mitindog ang tawo ug mibarog didto. Unya miingon si Jesus kanila, “Pangutan-on Ko kamo : Unsa ba ang gitugot sa atong Balaod nga mahimong buhaton nato sa Adlaw'ng Igpapahulay ? Ang pagtabang ba o ang pagdaot ? Ang pagluwas ba sa kinabuhi sa tawo o ang pagpatay ?” Gilibot Niya pagtan-aw silang tanan ug unya gisultihan Niya ang tawo, “Ituy-od ang imong kamot.” Ug gituy-od sa tawo ang iyang kamot ug naayo kini. Apan napungot sila pag-ayo ug nagsabot unsay ilang buhaton kang Jesus.

Pamalandong :

NGANONG KINAHANGLAN MAN NATONG BALAANON ANG ADLAW'NG DOMINGO ? 

Ang lihok sa Ginoo maoy atong panig-ingnan. Sama nga nihunong Siya sa pagtrabaho aron mopahulay sa ikapitong adlaw, kita usab mohunong sa mga naandang buluhaton sa Adlaw'ng Domingo aron sa paghatag og pahulay sa atong kaugalingon, sa mga silingan ug sa kinaiyahan. Ang Domingo, dili ang Sabado, maoy makahuloganong adlaw para kanatong mga Kristiyano tungod kay kini magpahinumdum sa pagkabanhaw sa Ginoo nga maoy timailhan sa kadaogan ug kaluwasan nga Iyang gikab-ot para kanatong tanan. Ang maong “pagpahulay” wala magdili kanato sa pagbuhat og maayo nianang adlawa. Gani, matag Domingo kita giawhag nga mosimba ug maghimo'g buhat sa kalooy para sa atong isigkatawo. Matod pa ni Mandy Hale, " There is nothing more delightful than someone who goes out of their way to make life beautiful for others.” 

pohsiBtebAyU