Lukas 17:5-10

 Ang Santos nga Ebanghelyo sumala ni San Lukas 17:5-10 (Sun. Oct. 2, 2022 Ikakawhaag-Pito Nga Domingo Sulod Sa Tuig)

Ang mga apostoles miingon sa Ginoo, “Dugangi ang among pagtuo.” Ug ang Ginoo mitubag, “Kon duna kamo'y pagtuo nga sama sa gidak-on sa liso sa mustasa, makasugo kamo sa kahoy nga sikomoro, ‘Maibot ug mabalhin ka ngadto sa dagat !’ ug kini motuman kaninyo. “Pananglitan adunay usa kaninyo nga may sulugoon nga nagdaro o nag-atiman sa mga karnero. Inig-abot niya gikan sa uma, ingnon ba nimo siya, ‘Pagdali diha aron mokaon ka’? Dili gayod ! Imo hinuon siyang ingnon, ‘Andama ang akong panihapon ug unya pagbakos ug silbihi ako. Human nako'g kaon, ikaw na usab !’ Ang usa ka sulugoon dili angayng pasalamatan tungod sa iyang pagtuman sa sugo, dili ba ? Mao usab kamo. Kon nakabuhat na kamo sa tanan nga gisugo kaninyo, ingna ninyo, ‘Mga sulugoon kami ug nagbuhat lamang sa among katungdanan.’”

Pamalandong :

UNSA MAY SAKTONG TUMONG SA PAGPANGALAGAD ? 

Si Jesus miingon : “Kon makabuhat na kamo sa tanan nga gisugo kaninyo, ingna ninyo 'Mga sulugoon kami ug nagbuhat lamang sa among katungdanan.'” Ang Ginoo nagtudlo sa pagpangalagad nga dili mag-apas og balos. Tukma kini nga pahimangno tungod kay daghan kanato moserbisyo nga gustong daygon ug balosan. Unya ra ba’g dili mapasidunggan ug mabalosan, magmahay dayon ug motagam. Kini magpakita nga ang atong pagtabang dili pa tiunay ug kinasingkasing. Ang maayong tumong sa pagpangalagad mao ang kadayganan sa Ginoo ug ang kaayohan sa isigkaingon, dili sa kaugalingon. Sakto ang nagsulat : “When we show kindness to those who can repay us, it’s called networking. When we show kindness with no thought of repayment, it’s called love.”

pohsiBtebAyU