Mateo 25:14-30

 Ang Santos nga Ebanghelyo sumala ni San Mateo 25:14-30 (Sat. Aug. 27, 2022)

“Kay ang paghari sa Dios sama sa usa ka tawo nga molakaw ngadto sa laing dapit. Gitawag niya ang iyang mga sulugoon ug gipiyalan niya sila sa iyang katigayonan sumala sa ilang katakos : ang usa gihatagan niya'g lima ka puntil nga salapi, ang usa duha ka puntil nga salapi ug ang usa pa gayod usa ka puntil nga salapi. Unya milakaw siya. Ang sulugoon nga nakadawat ug lima ka puntil nga salapi milakaw dayon. Gipatigayon niya kini ug nakaganansya siya ug lima nakaganansya siya ug lima ka puntil nga salapi. Ang nakadawat ug duha ka puntil nga salapi nakaganansya ug laing duha ka puntil nga salapi. Apan ang sulugoon nga nakadawat ug usa ka puntil nga salapi milakaw ug nagkalot sa yuta ug gilubong niya ang salapi sa iyang agalon. “Tapos sa dugay nga panahon, mipauli ang agalon niadtong mga sulugoon ug nangayo'g husay kanila. Ang sulugoon nga nakadawat ug lima ka puntil nga salapi miadto kaniya. Miingon siya, ‘Sir, gihatagan mo ako'g lima ka puntil nga salapi ug niini nakaganansya ako ug laing lima ka puntil nga salapi. Nia ra ang tanan.’ Miingon ang iyang agalon, ‘Maayo ! Buotan ka ug matinumanon nga sulugoon. Kay kasaligan ka man sa diyutay, piyalan ko ikaw sa daghan. Dali, sulod ngari ug ambit sa akong kalipay !’ Unya misulod ang sulugoon nga gihatagan ug duha ka puntil nga salapi ug miingon, ‘Sir, gihatagan mo ako'g duha ka puntil nga salapi ug niini nakaganansya ako ug laing duha ka puntil nga salapi. Ania ang tanan.’ Miingon ang iyang agalon, ‘Maayo ! Buotan ka ug matinumanon nga sulugoon. Kay kasaligan ka man sa diyutay, piyalan ko ikaw sa daghan. Dali, sulod ngari ug ambit sa akong kalipay !’ Unya misulod ang sulugoon nga nakadawat ug usa ka puntil nga salapi ug miingon, ‘Sir, nasayod ako nga estrikto ka kaayo ; nag-ani ka sa wala mo itanom ug naghipos sa wala mo ipugas. Nahadlok ako, busa milakaw ako ug gilubong ko ang imong salapi sa ilalom sa yuta. Tan-awa, Sir, ania ang imong salapi.’ Miingon ang agalon, ‘Walay hinungdan ug tapolan nga sulugoon ! Nasayod ka man diay nga nag-ani ako sa wala ko itanom ug naghipos sa wala ko ipugas, nganong wala mo man ideposito sa bangko ang akong salapi aron mahibalik kini kanako nga may tubo na ?’ Ug miingon ang agalon ngadto sa laing sulugoon, ‘Kuhaa kaniya ang salapi ug ihatag ngadto sa sulugoon nga may napulo ka puntil nga salapi. Kay ang anaay iya hatagan pag dugang ug makabaton siya'g labaw pa sa iyang gikinahanglan. Apan ang wala gayoy iya, bisan pa gani ang diyutay nga iyaha kuhaon pa gikan kaniya. Ug kining walay hinungdan nga sulugoon ilabay ngadto sa gawas diha sa kangitngit ; didto maghilak siya ug magkagot ang iyang ngipon.’

Pamalandong :

UNSA MAY ATONG BUHATON SA MGA TALENTO NGA GIHATAG KANATO SA DIOS ? 

Ang Sambingay nagtudlo nga ang katawhan gihatagan sa Dios og lain-laing mga talento. Ang Dios malipay kon atong gamiton ug palamboon ang iyang hinatag nga mga talento ; masuko Siya kon kini ato lang pakatulgon. Pinaagi sa Sambingay gidasig kita sa pag-ila sa atong tagsatagsa ka mga abilidad ug kaantigohan, ug sa paggamit niini alang sa pag-alagad sa uban. Ang saktong paggamit sa mga talento maoy usa ka paagi sa pagpasidungog sa Dios. Dili importante kon unsa ang matang ug gidaghanon sa mga talento ang anaa kanato. Ang mahinungdanon mao nga ato kining gigamit para sa kaayohan sa katawhan sa Dios. Adunay nag-ingon : “Your talent is God’s gift to you. What you do with it is your gift back to God.”

pohsiBtebAyU