Mateo 24:42-51

 Ang Santos nga Ebanghelyo sumala ni San Mateo 24:42-51 (Thu. Aug. 25, 2022)

Busa pagbantay kamo kay wala kamo masayod kon unsang adlawa moanhi ang inyong Ginoo. Hinumdomi kini : kon ang agalon sa panimalay nasayod pa unta unsang taknaa sa gabii moabot ang kawatan, magtukaw gayod siya ug dili motugot nga ang kawatan molungkab sa balay. Busa kamo usab kinahanglan mag-andam kanunay kay moabot ang Anak sa Tawo sa takna nga kamo wala magpaabot Kaniya. “Busa, kinsa man ang buotan ug maalamon nga sulugoon ? Kadtong gipiyalan sa iyang agalon sa pagdumala sa ubang mga sulugoon aron paghatag kanila'g pagkaon sa hustong panahon. Pagkabulahan niadtong sulugoon nga makaplagan sa iyang agalon nga nagtuman niini sa paghiuli niya ! Sultihan Ko kamo nga ang maong sulugoon himoon sa agalon nga piniyalan sa tanan niyang katigayonan. Apan kon daotan siya nga sulugoon, moingon siya sa iyang kaugalingon, ‘Dugay pang mouli ang akong agalon,’ ug mosugod siya pagpamunal sa iyang mga kaubang sulugoon ug magpalabig kaon ug inom uban sa mga palahubog. Unya ang agalon niadtong sulugoon mahibalik usa niana ka adlaw nga wala niya paabota ug sa takna nga wala niya hibaloi. Unya tagodtagoron siya sa agalon ug ipahamtang kaniya ang gidangatan sa mga tigpakaaron-ingnon. Didto maghilak siya ug magkagot ang iyang ngipon.

Pamalandong :

ANDAM BA KITA SA PAG-ABOT SA ATONG KAMATAYON ? Kasagaran kanato dili andam ; ang uban wala gani magplano nga mangandam. Daghan ang dili ganahan mag-estorya sa reyalidad sa kamatayon tungod kay giisip nila kini nga “taboo” o butang nga dili angay’ng hisgotan. Aduna usa'y patoo-too nga kon ang tawo maghisgot og kamatayon, madali ang iya mismong kamatayon. Dili kini tinuod. Ang Ebanghelyo karon nagtudlo nga ang kamatayon usa ka reyalidad nga angay’ng atubangon, dili ilimod ; pangandaman, dili baliwalaon. Ug dugang pa niana,  gihulagway niini ang kamatayon nga daw sama sa kawatan, tungod kay muabot kini sa panahon nga wala nato damha. Busa, gihagit kita nga mag-andam kanunay sa pag-abot niini. Adunay panultihon nga nagkanayon, “By failing to prepare, you are preparing to fail.” Hinaot nga dili unta kini mahitabo kanato.

pohsiBtebAyU