Mateo 22:1-14

 Ang Santos nga Ebanghelyo sumala ni San Mateo 22:1-14 (Thu. Aug. 18, 2022)

Migamit na usab si Jesus ug mga sambingay sa Iyang pagpakigsulti sa mga tawo. “Ang paghari sa Dios sama niini : adunay usa ka hari nga naghikay ug usa ka kombira sa kasal alang sa iyang anak nga lalaki. Gisugo niya ang iyang mga sulugoon aron pagpahibalo sa mga dinapit nga paadtoon na sila sa kombira apan mibalibad ang mga dinapit. Busa nagsugo siya'g laing mga sulugoon ug giingnan niya, ‘Sultihi ninyo ang mga dinapit nga andam na ang kombira. Giihaw na ang akong mga baka ug ang mga pinatambok nga nati ug nahikay na ang tanan. Panganhi na kamo sa kombira sa kasal !’ Apan wala magtagad ang mga dinapit ug nagpadayon sila sa ilang mga buluhaton : ang usa miadto sa iyang uma, ang usa sa iyang patigayon. Ang uban usab mibira sa mga sulugoon ug gibunalan ug gipatay nila. Tungod niini nasuko pag-ayo ang hari. Busa gipadala niya ang iyang mga sundalo ug gipamatay kadtong mga nagpatay sa iyang mga sulugoon ug gisunog ang ilang siyudad. Unya gitawag niya ang iyang mga sulugoon ug giingnan, ‘Andam na ang akong kombira sa kasal apan dili angay niini ang mga tawo nga akong gidapit. Busa pangadto kamo sa kadalanan ug dapita sa kombira ang tanan nga inyong matagbuan.’ Ug ang mga sulugoon nangadto sa kadalanan ug gidala nila ang tanan nga ilang natagbuan, maayo ug daotan. Ug napuno sa mga tawo ang kombira. “Unya misulod ang hari aron pagtan-aw sa mga dinapit ug nakita niya ang usa ka tawo nga wala magsul-ob ug bisti nga angay sa kasal. Gipangutana siya sa hari, ‘Higala, giunsa man nimo pagsulod dinhi nga wala ka man magsul-ob ug bisti nga angay sa kasal ?’ Apan wala makatingog ang tawo. Unya miingon ang hari sa iyang mga sulugoon, ‘Gaposa ninyo ang iyang mga kamot ug tiil ug ilabay siya ngadto sa kangitngit sa gawas. Didto maghilak siya ug magkagot ang iyang mga ngipon.’ ” Ug gitapos ni Jesus ang sambingay sa pag-ingon, “Kay daghan ang gidapit, apan diyutay ra ang gipili.”

Pamalandong :

UNSA MAN NGA BISTI ANG ATONG ISUL-OB SA PAGTAMBONG SA KOMBIRA SA DIOS ? 

Ang Kristohanong kinabuhi gihulagway sa sambingay isip usa ka dakong kombira sa kasal. Ang Dios Amahan mao ang hari nga nagdapit og mga tawo nga motambong sa kasal sa Iyang Anak nga mao si Kristo. Ang pag-apil sa maong kombira ikalipay pag-ayo sa Hari ; ang pagbalibad maghatag kaniya’g dakong kasubo. Kon kita moduyog sa kombira, gilauman kita nga magsul-ob og saktong bisti. Ang bisti nga gipasabot dinhi dili materyal kondili espiritwal. Si San Pablo nagdasig : “Clothe yourself with compassion, kindness, humility, gentleness and patience...above all, love” (Col 3:12). Ang “bisti sa kasal” diay mao ang mga mithi sa Ebanghelyo nga angay natong huptan aron masinati ang kalipay sa pagpakig-uban sa Dios ug sa Iyang katawhan. Si San Basilio nag-ingon, "A tree is known by its fruit ; a man by his deeds. A good deed is never lost ; he who sows courtesy reaps friendship, and he who plants kindness gathers love."

pohsiBtebAyU