Mateo 18:1-5,10,12-14

 Ang Santos nga Ebanghelyo sumala ni San Mateo 18:1-5,10,12-14 (Tue. Aug. 9, 2022)

Niadtong higayona ang mga tinun-an nangadto kang Jesus ug nangutana, “Kinsa man ang ilhong labing dako sa Gingharian sa langit ?” Si Jesus mitawag ug usa ka bata ug gipatindog Niya sa atubangan nila. Unya miingon Siya, “Mao kini ang tinuod : gawas kon mausab kamo ug mahimong sama sa mga bata, dili gayod kamo makasulod sa Gingharian sa langit. Ang labing dako ilalom sa pagmando sa Dios mao kadtong magpaubos sa iyang kaugalingon ug magpakasama niining bataa. Ug ang magdawat sa usa ka bata nga sama niini sa Akong ngalan, magadawat Kanako. “Matngoni ninyo nga dili kamo magtamay bisag usa niining mga gagmayng bata nga nagtuo Kanako. Kay sultihan Ko kamo nga ang ilang mga anghel atua kanunay sa atubangan sa Akong Amahan didto sa langit.  “Sa inyong hunahuna, unsa may buhaton sa usa ka tawo kon kawad-an siya'g usa sa iyang usa ka gatos ka karnero ? Iya gayong biyaan ang 99 nga manibsib didto sa bungtod ug molakaw siya aron pagpangita sa nawala. Sultihan Ko kamo nga sa dihang makit-an na niya kini, mas malipay pa siya pag-ayo tungod niining karneroha kay sa 99 nga wala mawala. Sa samang paagi, ang inyong Amahan nga atua sa langit dili buot nga may mawala bisag usa niining mga gagmayng bata.

Pamalandong :

KINSA MAN ANG “SAMA SA MGA BATA,” NGA MAOY LABING HALANGDON SA MGA MATA SA DIOS ? 

Una, ang sama sa mga bata mao ang mga tawo nga labing nanginahanglan og tabang. Sila ang mga kabos, walay trabaho, masakiton, inosente, ug walay tingog sa katilingban. Kon ato silang tagdon ug tabangan, sama ra nga atong giatiman si Kristo. Ug ikaduha, ang sama sa mga bata mao ang mga tawong mapaubsanon ug wala mangandoy nga daygon. Nasayod sila nga ang tanan nga ilang naangkon bunga sa lihok sa Dios, ug nga ang Dios lamang ang angay’ng pasidunggan. Kada adlaw mag-ampo sila tungod kay nasayod sila nga kon wala ang Dios wala silay mahimo. Adunay nag-ingon : “Being humble is much more important than being wise because God doesn’t need a proud mouth that speaks much but a kind heart that listens.”

pohsiBtebAyU